| 章節 | 現代台語漢字2021版經文 |
| 19:1 | 赤色牛母的灰 上主對摩西及亞倫講： |
| 19:2 | 「上主所命令的律法有一條按呢講：你著吩咐以色列人牽一隻健康、無瑕疵、毋曾掛軛的赤色牛母來你遮。 |
| 19:3 | 著將伊交互祭司以利亞撒，帶出去營外，佇以利亞撒的面前給伊刣死。 |
| 19:4 | 祭司以利亞撒著用指頭仔搵血，向會幕頭前灑七遍。 |
| 19:5 | 著有一個人佇祭司的目睭前燒此隻牛母，嘛將伊的皮、肉、血，及糞燒掉。 |
| 19:6 | 祭司著將柏香柴、牛膝草、朱紅色的紗，攏㧒佇燒牛的火中。 |
| 19:7 | 後來祭司著洗伊的衫，洗身軀，才通入營地；到日落以後才清氣。 |
| 19:8 | 燒牛母的人嘛著洗伊的衫，洗身軀；到日落以後才清氣。 |
| 19:9 | 著有一個清氣的人收拾牛母的灰，保存佇營外禮儀上清氣的所在，留啲做潔淨的水的路用，通給以色列會眾的罪除去。 |
| 19:10 | 收拾牛母的灰的人著洗伊的衫；到日落以後才清氣。這欲做以色列人及寄居佇𪜶中間的外族人永遠的規例。」 |
| 19:11 | 摸著屍體的潔淨禮 若有人摸著人的屍體，就會七日久無清氣。 |
| 19:12 | 彼個人到第三日，著用彼個摻赤色牛母的灰的水潔淨家己，到第七日才清氣；伊若佇第三日無潔淨家己，到第七日猶是無清氣。 |
| 19:13 | 若有人摸著人的屍體，閣無潔淨家己，就是拍垃墋上主的會幕，此個人著給伊對以色列人的中間革出；因為伊的身軀無灑潔淨的水，伊猶無清氣。 |
| 19:14 | 下面是有關人死佇布棚內潔淨的條例：入去彼個布棚，以及所有佇布棚內的人，七日久攏無清氣。 |
| 19:15 | 布棚內無蓋蓋的器具嘛是無清氣。 |
| 19:16 | 若有人佇野外摸著互人刣死抑是自然死的屍體，抑是人的骨頭，抑是墓，七日久攏無清氣。 |
| 19:17 | 著為無清氣的人提一寡赤色牛母的灰，下佇器具內，倒活水佇彼內面。 |
| 19:18 | 著有一個禮儀上清氣的人提牛膝草搵此個水，灑布棚、所有的器具，及布棚內面的人，閣灑許個摸著墓、骨頭、自然死的人，以及摸著屍體的人。 |
| 19:19 | 第三日及第七日，清氣的人著給許個無清氣的人灑水，互𪜶到第七日得著清氣。許個人著洗衫，洗身軀；到日落以後才清氣。 |
| 19:20 | 彼個無清氣閣無去潔淨家己的人，著對會眾的中間給伊革出，因為伊拍垃墋上主的聖所；潔淨的水無灑佇伊的身軀，伊是無清氣的人。 |
| 19:21 | 這欲做以色列人永遠的規例。彼個給人灑潔淨的水的人著洗伊的衫；若有人摸著潔淨的水，日落以前伊是無清氣。 |
| 19:22 | 互無清氣的人摸著的物件是無清氣；摸著許個物件的人，日落以前攏無清氣。 |