| 章節 | 現代台語漢字2021版經文 |
| 17:1 | 亞倫的柺 上主對摩西講： |
| 17:2 | 「你著吩咐以色列人，逐支族的首領攏著攑𪜶的柺仔來，攏總十二支。你著佇𪜶的柺仔寫𪜶的名。 |
| 17:3 | 利未支族彼支柺仔著寫亞倫的名；因為逐支族的族長攏有一支柺仔。 |
| 17:4 | 你著將許個柺仔提來會幕，下佇約櫃的頭前，就是我及恁相會的所在。 |
| 17:5 | 我所揀彼個人，伊的柺仔會茁芽；按呢我欲互以色列人𣍐閣埋怨恁。」 |
| 17:6 | 摩西將諸個話給以色列人講，逐個支族的首領就將𪜶的柺仔交互摩西；一個支族一支，共十二支；亞倫的柺仔嘛佇彼中間。 |
| 17:7 | 摩西就將許個柺仔提入去囥約櫃的帳幕內面，下佇上主的面前。 |
| 17:8 | 隔日，摩西入去囥約櫃的帳幕，看著利未支族亞倫的柺仔已經茁芽，生花莓，開花，結杏仁。 |
| 17:9 | 摩西對上主的面前攑許個柺仔出來，去以色列的眾人遐，互𪜶看；逐個族長就去攑家己的柺仔。 |
| 17:10 | 上主對摩西講：「將亞倫的柺仔囥倒去約櫃面前，做諸個背逆的人的鑑戒。按呢𪜶就𣍐閣對我發怨言，嘛𣍐因為按呢來死。」 |
| 17:11 | 摩西就照上主的命令做。 |
| 17:12 | 以色列人對摩西講：「慘啊！阮會死，會滅亡，阮會死了了。 |
| 17:13 | 所有倚近上主的會幕的攏會死。按呢，阮穩死的！」 |