| 章節 | 現代台語漢字2021版經文 |
| 12:1 | 美莉安及亞倫批評摩西 美莉安及亞倫批評摩西，因為伊娶古實女子做某。𪜶講： |
| 12:2 | 「上主豈干焦通過摩西講話？豈無嘛通過阮講話？」諸個話上主有聽著。 |
| 12:3 | 摩西作人非常謙卑，贏過世間所有的人。 |
| 12:4 | 忽然，上主對摩西、亞倫，及美莉安講：「恁三個攏出來會幕遮。」𪜶三個就出來。 |
| 12:5 | 上主佇雲柱中降臨，徛佇會幕門口，叫亞倫及美莉安；𪜶兩個就行進前。 |
| 12:6 | 上主講：「恁著聽我的話。恁中間若有先知，我上主是用異象互𪜶識我，通過眠夢及𪜶講話。 |
| 12:7 | 毋拘我的僕人摩西毋是按呢；我有將我的全家交代伊。 |
| 12:8 | 我是及伊面對面講話；明明講，伊毋免臆。伊甚至會看見我的形狀。恁哪敢批評我的僕人摩西？」 |
| 12:9 | 上主對𪜶受氣，就離開。 |
| 12:10 | 雲對會幕的頂面徙開；美莉安忽然起嚴重的皮膚病，伊的皮膚親像雪赫白。亞倫看著美莉安起嚴重的皮膚病， |
| 12:11 | 就對摩西講：「我的主啊，求你毋通因為阮愚戇犯罪，互阮受刑罰。 |
| 12:12 | 求你毋通互伊親像出母胎就爛一半的死胎。」 |
| 12:13 | 摩西就哀求上主，講：「上帝啊，求你醫好美莉安。」 |
| 12:14 | 上主對摩西講：「伊的老父若給伊呸嘴涎佇面裡，伊豈毋免見笑七日？今著給伊隔離佇營外七日，然後才通互伊轉來。」 |
| 12:15 | 對按呢，美莉安就互人隔離佇營外七日；人民無起程，聽候到美莉安倒來。 |
| 12:16 | 後來，人民對哈洗錄起程，到巴蘭的曠野紮營。 |