| 章節 | 現代台語漢字2021版經文 |
| 2:1 | 逐支族紮營的位置 上主閣吩咐摩西及亞倫，講： |
| 2:2 | 「以色列人攏著照家己支族的大旗及宗族的記號，佇會幕的周圍向會幕紮營。 |
| 2:3 | 「東旁，向日出的方向，𫞼猶大支族的大旗，猶大的軍隊佇遐紮營；亞米拿達的子拿順做首領， |
| 2:4 | 人數七萬四千六百名。 |
| 2:5 | 佇𪜶邊仔紮營的是以薩迦支族，蘇押的子拿坦業做首領， |
| 2:6 | 人數五萬四千四百名。 |
| 2:7 | 閣來是西布倫支族，希倫的子以利押做首領， |
| 2:8 | 人數五萬七千四百名。 |
| 2:9 | 屬猶大區的人數總共十八萬六千四百名。𪜶作頭出發。 |
| 2:10 | 「南旁，𫞼呂便支族的大旗，呂便的軍隊佇遐紮營，示丟珥的子以利蓿做首領， |
| 2:11 | 人數共四萬六千五百名。 |
| 2:12 | 佇𪜶邊仔紮營的是西緬支族，蘇利沙代的子示路蜜做首領， |
| 2:13 | 人數共五萬九千三百名。 |
| 2:14 | 閣來是迦得支族，丟珥的子以利雅薩做首領， |
| 2:15 | 人數共四萬五千六百五十名。 |
| 2:16 | 屬呂便區的人數總共十五萬一千四百五十名。𪜶做第二大隊出發。 |
| 2:17 | 「會幕及利未人著佇前兩大隊及後兩大隊的中間。𪜶按怎紮營，就照彼個次序起身；逐支族著隨𪜶家己支族的大旗前進。 |
| 2:18 | 「西旁，𫞼以法蓮支族的大旗，以法蓮的軍隊佇遐紮營，亞米忽的子以利沙瑪做首領， |
| 2:19 | 人數共四萬空五百名。 |
| 2:20 | 佇𪜶邊仔的是瑪拿西支族，比大蓿的子迦瑪列做首領， |
| 2:21 | 人數共三萬兩千兩百名。 |
| 2:22 | 閣來是便雅憫支族，基多尼的子亞比但做首領， |
| 2:23 | 人數共三萬五千四百名。 |
| 2:24 | 屬以法蓮區，人數總共十萬八千一百名。𪜶做第三大隊出發。 |
| 2:25 | 「北旁，𫞼但支族的大旗，但的軍隊佇遐紮營，亞米沙代的子亞希以謝做首領， |
| 2:26 | 人數共六萬兩千七百名。 |
| 2:27 | 佇𪜶邊仔的是亞設支族，俄蘭的子帕結做首領， |
| 2:28 | 人數共四萬一千五百名。 |
| 2:29 | 閣來是拿弗他利支族，以南的子亞希拉做首領， |
| 2:30 | 人數共五萬三千四百名。 |
| 2:31 | 屬但彼區，人數總共十五萬七千六百名。此大隊著隨𪜶的大旗最後出發。」 |
| 2:32 | 以上是以色列人照𪜶的宗族，佇營內照𪜶的部隊統計的人數，總共六十萬三千五百五十名。 |
| 2:33 | 毋拘利未人無算在內，是照上主對摩西的命令。 |
| 2:34 | 以色列人照𪜶的宗族、家族，隨𪜶逐支族的大旗紮營，出發，攏照上主對摩西的命令。 |