| 章節 | 現代台語漢字2021版經文 |
| 27:1 | 下願的條例 上主命令摩西 |
| 27:2 | 著對以色列人宣布：若有人下特別的願欲獻身互上主，伊著照你所估計彼個人的價錢奉獻。 |
| 27:3 | 照聖所的規定：
二十歲到六十歲， 查甫人五百五十公克的銀， 查某人三百四十二公克的銀； 五歲到二十歲， 查甫囝仔兩百二十八公克的銀， 查某囝仔一百十四公克的銀； 滿月到五歲， 查甫囝仔五十七公克的銀， 查某囝仔三十四公克的銀； 六十歲以上， 查甫人一百七十一公克的銀， 查某人一百十四公克的銀。 |
| 27:4 | 併於上節 |
| 27:5 | 併於上節 |
| 27:6 | 併於上節 |
| 27:7 | 併於上節 |
| 27:8 | 下願的人若散赤，𣍐當照規定的價錢奉獻，就著去祭司遐，互祭司照彼個人的財力給伊估計。 |
| 27:9 | 若有人獻牲生做禮物互上主，著給彼隻牲生分別作聖， |
| 27:10 | 毋通用別隻替換，無論是用好的換僫的，抑是用僫的換好的；若用牲生替換牲生，兩隻攏著分別作聖。 |
| 27:11 | 人獻互上主做禮物的牲生若無清氣，就著帶彼隻牲生去祭司遐， |
| 27:12 | 祭司著照牲生的好僫估計；祭司估計偌多就是偌多。 |
| 27:13 | 彼個人若一定欲贖回，就著佇估計的價錢以外加添五分一。 |
| 27:14 | 若有人給厝奉獻互上主，祭司著照厝的好僫估計；祭司估計偌多就是偌多。 |
| 27:15 | 給彼間厝奉獻互上主的人若欲贖回，就著佇估計的價錢以外加添五分一，厝才通還伊。 |
| 27:16 | 若有人將繼承的土地的一部份奉獻互上主，著照彼塊地會當撒偌多種籽來估計；若會當撒大麥二十公斤，價錢就是五百七十公克的銀。 |
| 27:17 | 伊若佇恩惠的年將地奉獻互上主，彼塊地的價值就是照你估計的價錢。 |
| 27:18 | 伊若佇恩惠的年以後奉獻，祭司著照彼年到後遍恩惠的年所賰的年數，對原來所估價的扣起來。 |
| 27:19 | 奉獻的人若一定欲贖回，就著佇估計的價錢以外加添五分一，地才通還伊。 |
| 27:20 | 伊若無欲贖回彼塊地，抑是賣互別人，就𣍐當閣贖回。 |
| 27:21 | 到恩惠的年，彼塊地著永遠歸上主，做祭司的產業。 |
| 27:22 | 若是伊奉獻互上主的地是買來的，毋是繼承的， |
| 27:23 | 祭司著照彼年到恩惠的年的年數，估計彼塊地的價錢；彼日伊著照估計的價錢獻互上主。 |
| 27:24 | 到恩惠的年，彼塊地著歸互原主，就是繼承彼塊地的人。 |
| 27:25 | 祭司著照聖所的公秤估計。 |
| 27:26 | 頭一胎的牲生，無論是牛抑是羊，已經歸互上主，𣍐用得閣獻互上主。 |
| 27:27 | 若是頭一胎的牲生無清氣，就著照估計的價錢加五分一贖回；若無欲贖回，就著照估計的價錢給賣掉。 |
| 27:28 | 若有人將伊所有的永遠獻互上主，無論是人，是牲生，抑是繼承的土地，攏𣍐用得賣，嘛𣍐用得贖回；伊獻的是至聖，永遠歸上主。 |
| 27:29 | 獻互上主著完全毀滅的人，𣍐用得贖回；伊一定著受處死。 |
| 27:30 | 土地出產的物，無論是五穀，抑是樹頂的果子，十分一攏是上主的，是聖的。 |
| 27:31 | 若有人欲贖回此十分一的物，著加五分一。 |
| 27:32 | 牛群及羊群經過牧者柺仔下，逐遍算到第十隻，彼隻著奉獻互上主。 |
| 27:33 | 無論好僫，攏毋通替換；若替換，兩隻攏著分別作聖，𣍐用得贖回。 |
| 27:34 | 以上諸個是上主佇西奈山通過摩西對以色列人頒布的命令。 |