| 章節 | 現代台語漢字2021版經文 |
| 25:1 | 安歇年 ( 申 15:1-11 ) 上主佇西奈山吩咐摩西 |
| 25:2 | 對以色列人宣布：恁進入我賞賜恁彼個地了後，土地佇第七年著為上主守安歇，𣍐用得種作。 |
| 25:3 | 六年久，田園通種作，葡萄園通修整，出產通收成。 |
| 25:4 | 第七年，土地著完全歇睏，為上主守安歇年；田園毋通種作，葡萄園毋通修整。 |
| 25:5 | 家己發的五穀毋通收割，無修整過的葡萄樹嘛毋通收成；此年是土地的安歇年。 |
| 25:6 | 安歇年土地的出產攏欲互你及你的僕人、女婢、倩工、寄居佇恁遐的外族人， |
| 25:7 | 及牲生，以及佇你的土地的走獸做食物。 |
| 25:8 | 恩惠的年 你著算七個七年，就是七個安歇年，總共四十九年。 |
| 25:9 | 彼年的七月初十，就是贖罪日，你著派人佇全地歕哨角。 |
| 25:10 | 恁著給第五十年分別作聖，佇全地向所有的住民宣布自由；此年是恩惠的年。恁買來的土地著還互原主，買來的奴隸著互伊轉去伊家己的家庭。 |
| 25:11 | 第五十年欲做恁恩惠的年，毋通種作；地家己發的，毋通收割；無修整的葡萄樹，毋通收成。 |
| 25:12 | 因為彼年是恩惠的年，恁著給伊分別作聖；恁通食土地家己出的土產。 |
| 25:13 | 此個恩惠的年，恁逐個人買來的土地著還互原主。 |
| 25:14 | 恁同胞的中間互相買賣土地，毋通相偏。 |
| 25:15 | 若對同胞買，恩惠的年過了的年數通減起來；賣主著照離下一遍恩惠的年猶有幾年通收成的年數賣互你。 |
| 25:16 | 年數愈多價數愈高，年數愈少價數愈低，是照收成的總額賣。 |
| 25:17 | 恁毋通相偏，只有著敬畏恁的上帝。我是上主 — 恁的上帝。 |
| 25:18 | 安歇年的食物 恁著切實遵行我的規例及命令，就會當佇彼個地安居樂業。 |
| 25:19 | 地嘛會出土產，互恁食到飽，佇彼個地久長徛起。 |
| 25:20 | 若有人講：「阮佇第七年無種作，無收成，按呢欲食什麼？」 |
| 25:21 | 我一定會佇第六年賜福氣互恁，互恁佇此年有三年的收成。 |
| 25:22 | 第八年恁著種作，毋拘猶有舊的收成通食。到第九年，恁收成的時嘛猶啲食舊的米糧。 |
| 25:23 | 贖回土地及厝的條例 土地毋通永遠賣斷，因為地是我的；恁佇我的面前是出外人，是寄居的。 |
| 25:24 | 恁得著做產業的全部土地，著允准人會當贖回。 |
| 25:25 | 你的親族若有人散赤，賣伊一部份的土地，伊的至親著給伊賣出去的土地贖回。 |
| 25:26 | 若無至親通給土地贖回，伊家己後來若閣有錢，有夠通贖回， |
| 25:27 | 就著計算賣出去的年數，將到下一遍恩惠的年所賰年數的錢額還互買主，伊家己就通贖回伊的產業。 |
| 25:28 | 彼個人若𣍐當贖回伊家己的土地，賣出去的土地猶原留佇買去的人的手；恩惠的年到，土地著交出去，還互原來的地主。 |
| 25:29 | 另外，若有人賣城牆內的厝，一年內伊有權通給厝贖回。 |
| 25:30 | 一年內若無贖回，彼間厝就永遠歸買主及伊的子孫；佇恩惠的年嘛𣍐當贖回。 |
| 25:31 | 毋拘佇無城牆庄社的厝，及庄社的土地仝款通贖回；到恩惠的年，買的人著還互原來的地主。 |
| 25:32 | 利未人佇𪜶做產業的城的厝，不管時攏會當贖回。 |
| 25:33 | 若有人買利未人的城的厝，利未人無贖回，到恩惠的年著還互利未人，因為彼是𪜶佇以色列人中分著的產業。 |
| 25:34 | 毋拘利未人的城周圍的草場毋通賣，因為彼是𪜶永遠的產業。 |
| 25:35 | 錢借互散赤人的條例 你的同胞若變散赤，𣍐當家己生活，你著供給伊，親像啲幫贊外族人及寄居的，互伊及你做夥生活。 |
| 25:36 | 毋通給伊提利息，閣較毋通提重利；著敬畏你的上帝，互你的同胞及你做夥生活。 |
| 25:37 | 你借伊錢毋通給伊提利息，你借伊米糧嘛毋通提較加。 |
| 25:38 | 我是上主 — 恁的上帝，有導恁出埃及，將迦南地賞賜恁，閣欲做恁的上帝。 |
| 25:39 | 贖回奴隸的條例 你的同胞若散甲將家己賣互你，毋通互伊親像奴隸服事你。 |
| 25:40 | 伊住你遐，你著對待伊親像對待倩工及寄居的像款，互伊服事你到恩惠的年。 |
| 25:41 | 彼時伊通離開，及伊的子兒做夥倒去伊的本家，倒去𪜶祖先的土地遐。 |
| 25:42 | 因為𪜶是我的僕人，是我對埃及地導出來的，毋通給伊賣做奴隸。 |
| 25:43 | 毋通殘忍管轄伊，著驚畏你的上帝。 |
| 25:44 | 你若需要男女奴隸，會當對周圍的國家買， |
| 25:45 | 嘛會當買寄居佇恁中間的外族人，抑是𪜶的家眷佇恁遐生的子兒；𪜶欲做你的家業。 |
| 25:46 | 恁通留𪜶做恁的子孫的家業，互𪜶一世人做奴隸服事恁的子孫；毋拘恁的同胞以色列人，恁毋通殘忍對待𪜶。 |
| 25:47 | 住佇恁遮的外族人若變好額，毋拘你的同胞變散赤，將家己賣互許個外族人抑是𪜶的家族， |
| 25:48 | 互人買去此個人有贖回的權利。伊的兄弟會當給伊贖回， |
| 25:49 | 伊的阿叔阿伯，抑是叔伯兄弟，抑是親成嘛通給伊贖回；伊家己若有夠錢就通贖回家己。 |
| 25:50 | 伊著及買主算賬，對賣家己彼年起算到恩惠的年，看年數的多少，照倩工的工資及買主算。 |
| 25:51 | 伊著照所賰年數的多少，算贖回的價錢還互買主。 |
| 25:52 | 併於上節 |
| 25:53 | 買主毋通殘忍管轄伊，著對待伊親像對待逐年倩的工人仝款。 |
| 25:54 | 此個人若𣍐當照按呢受贖，到恩惠的年，伊及伊的子兒就通自由離開。 |
| 25:55 | 以色列人是我的僕人，是我對埃及地給𪜶導出來的。我是上主 — 恁的上帝。 |