| 章節 | 現代台語漢字2021版經文 |
| 17:1 | 刣牲生獻祭的條例 上主吩咐摩西，講： |
| 17:2 | 「你著對亞倫及伊的子，以及以色列眾人宣布上主命令的條例： |
| 17:3 | 所有以色列家的人，無論佇營內營外刣牛、綿羊抑是山羊， |
| 17:4 | 若無先牽來會幕門口，佇上主會幕的頭前獻互上主做禮物，刣牲生的罪欲歸佇彼個人，因為伊有流𪜶的血；彼個人著對人民中間革出。 |
| 17:5 | 因為以色列人曾佇野外刣牲生獻祭；今著將牲生帶來會幕門口，交互祭司，獻互上主做平安祭。 |
| 17:6 | 祭司著將血灑佇會幕門口上主的祭壇，將油燒做芳芳的祭獻互上主。 |
| 17:7 | 以色列人毋通閣獻祭互𪜶行邪淫敬拜的山羊鬼魔。這欲做恁世世代代永遠的規例。 |
| 17:8 | 「你著給𪜶吩咐，所有以色列家的人，抑是寄居佇𪜶中間的外族人，獻燒化祭抑是祭物， |
| 17:9 | 若無帶來會幕門口獻互上主，彼個人著對人民的中間革出。」 |
| 17:10 | 禁止食血 上主講：「所有屬以色列家的人，抑是寄居佇恁中間的外族人，若食血，我欲對彼個人變面，給伊對人民中間革出。 |
| 17:11 | 動物有血才有性命；我將血互恁，是欲用此個血佇祭壇頂為恁的性命贖罪；因為血是性命，會當贖罪。 |
| 17:12 | 所以我對以色列人講：恁攏𣍐用得食血，寄居佇恁中間的外族人嘛𣍐用得食血。 |
| 17:13 | 「所有的以色列人，抑是寄居佇恁中間的外族人，若拍獵得著會食得的飛鳥及走獸，著給伊放血，用土給血蓋起來。 |
| 17:14 | 所有的動物，血是伊的性命，所以我對以色列人講：無論什麼動物的血，恁攏𣍐用得食。因為動物有血才有性命；食血的人一定著受革出。 |
| 17:15 | 「若有人食自然死抑是互野獸拆裂的動物，無論是在地人抑是外族人攏是無清氣，著洗伊的衫，洗身軀，到日落才清氣。 |
| 17:16 | 毋拘伊若無洗衫，無洗身軀，著對家己的罪負責任。」 |