| 章節 | 現代台語漢字2021版經文 |
| 14:1 | 痲瘋病潔淨的條例 上主命令摩西，講： |
| 14:2 | 痲瘋病人得著清氣的時，著照下面的條例做：著給伊導去見祭司。 |
| 14:3 | 祭司著出去營外給伊檢查；病人的症頭若已經好， |
| 14:4 | 祭司著吩咐人為著彼個欲得著清氣的人，取兩隻禮儀上清氣活活的鳥、柏香柴、朱紅色的紗，及牛膝草； |
| 14:5 | 閣吩咐人佇貯活水的粗瓷器具頂面刣其中的一隻鳥仔。 |
| 14:6 | 然後，祭司著掠彼隻活鳥，及柏香柴、朱紅色的紗，以及牛膝草，浸佇彼隻佇活水頂面刣的鳥仔的血內面。 |
| 14:7 | 伊著將血佇彼個欲得著清氣的人的身軀頂灑七遍，就宣布伊是清氣，閣給彼隻活鳥放去野外。 |
| 14:8 | 欲得著清氣的人著洗家己的衫，將毛攏剃起來，洗身軀，伊就清氣。然後，伊通入營，毋拘著先佇家己的布棚外住七日。 |
| 14:9 | 到第七日，伊著將歸身軀的毛剃起來，包括頭毛、嘴鬚、目眉，閣洗衫，洗身軀；按呢伊就完全清氣。 |
| 14:10 | 第八日，伊著帶兩隻無瑕疵的羊仔，及一隻一歲無瑕疵的羊母仔，閣提三公斤抄油的幼麵粉，及三分之一公升的油來。 |
| 14:11 | 主持潔淨禮的祭司著導彼個欲得著清氣的人，帶許個物件來會幕門口，徛佇上主面前。 |
| 14:12 | 祭司著獻一隻羊仔及三分之一公升的油做賠罪祭，給搖搖咧做祭物獻互上主。 |
| 14:13 | 伊著佇刣贖罪祭及燒化祭牲生的所在，刣彼隻羊仔。賠罪祭及贖罪祭仝款著歸互祭司；這是至聖的。 |
| 14:14 | 祭司著提一寡賠罪祭的血，抹佇欲得著清氣的人正旁的耳珠，以及正腳及正手的大頭姆； |
| 14:15 | 閣對彼三分之一公升的油倒一寡佇家己倒手的手心， |
| 14:16 | 用正手一支指頭仔搵倒旁手心的油，佇上主的面前灑油七遍。 |
| 14:17 | 後來，伊著閣搵手心的油，抹佇彼個欲得著清氣的人正旁的耳珠，以及正腳及正手的大頭姆，就是抹佇抵即抹過賠罪祭的血的頂面。 |
| 14:18 | 祭司著將手心賰的油，抹佇彼個欲得著清氣的人的頭殼頂。祭司就按呢佇上主的面前給彼個人贖罪。 |
| 14:19 | 祭司著為著彼個欲得著清氣的人獻贖罪祭，給伊贖罪，然後刣彼隻燒化祭的牲生。 |
| 14:20 | 祭司著佇祭壇頂獻燒化祭及素祭，為著伊贖罪；伊就清氣。 |
| 14:21 | 若有人散赤，𣍐當準備赫多，就著帶一隻羊仔做賠罪祭，佇上主的面前搖搖咧為伊贖罪；閣著帶一公斤抄油的幼麵粉及三分之一公升的油做素祭； |
| 14:22 | 閣照家己的財力取兩隻斑鴿抑是粉鳥仔子，一隻做贖罪祭，一隻做燒化祭。 |
| 14:23 | 第八日，伊著將諸個帶來會幕門口，佇上主的面前交互祭司，通得著清氣。 |
| 14:24 | 祭司著提賠罪祭的羊仔及三分之一公升的油，佇上主的面前搖搖咧做祭物。 |
| 14:25 | 祭司著刣賠罪祭的羊仔，提一寡賠罪祭的血，抹佇欲得著清氣的人正旁的耳珠，以及正腳及正手的大頭姆； |
| 14:26 | 閣倒一寡油佇家己倒手的手心， |
| 14:27 | 用正手一支指頭仔搵倒旁手心的油，佇上主的面前灑七遍。 |
| 14:28 | 後來，伊著閣搵手心的油，抹佇彼個欲得著清氣的人正旁的耳珠，以及正腳及正手的大頭姆，就是抹佇抵即抹過賠罪祭的血的頂面。 |
| 14:29 | 祭司著將手心賰的油，抹佇彼個欲得著清氣的人的頭殼頂。伊就按呢佇上主的面前給彼個人贖罪。 |
| 14:30 | 彼個人著照家己的財力獻一隻斑鴿抑是粉鳥仔子， |
| 14:31 | 就是照伊的氣力，一隻做贖罪祭，一隻做燒化祭，及素祭做夥獻。祭司就按呢佇上主的面前給彼個人贖罪。 |
| 14:32 | 以上是有人致著痲瘋，愛得著清氣，毋拘無財力照規定奉獻禮物所定的條例。 |
| 14:33 | 有關厝生菇的條例 上主命令摩西及亞倫，講： |
| 14:34 | 恁去到我賞賜恁做家業的迦南地的時，我互恁得著做家業的地的厝若生菇， |
| 14:35 | 厝的主人著去給祭司報告，講：「阮厝假若有生菇。」 |
| 14:36 | 祭司入去彼間厝檢查以前，著吩咐人將厝摒空，才免厝內所有的物件變做無清氣；後來伊才入去檢查彼間厝。 |
| 14:37 | 祭司著檢查彼間厝生菇的情形；若發見彼間厝的壁有綠色抑是紅色塌落去的痕跡，深入壁內， |
| 14:38 | 伊著出去門外，給彼間厝封七日。 |
| 14:39 | 第七日，祭司著閣去檢查；若發見生菇的痕跡有湠開， |
| 14:40 | 伊著吩咐人將許個生菇的石頭挖起來，㧒佇城外無清氣的所在； |
| 14:41 | 閣吩咐人剾厝內四周圍的壁；將剾落來的灰土摒佇城外無清氣的所在； |
| 14:42 | 然後用別所在的石頭，代替許個挖出來的石頭，閣用灰土抹彼間厝。 |
| 14:43 | 彼間厝佇挖石頭，剾壁，抹灰土了後，若發見閣有生菇， |
| 14:44 | 祭司著閣入去檢查；生菇的情形若湠到歸間厝，彼間厝是染著惡性的菇，是無清氣。 |
| 14:45 | 彼間厝著拆掉，許個石頭、柴料，及所有的灰土攏著搬出去城外無清氣的所在。 |
| 14:46 | 彼間厝封密的期間，若有人入去，伊佇日落以前是無清氣。 |
| 14:47 | 佇彼間厝睏過，飲食的人攏著洗𪜶的衫。 |
| 14:48 | 彼間厝抹灰土了後，祭司著入去檢查；生菇的情形若無湠開，祭司就著宣布彼間厝是清氣，因為生菇的情形已經消失。 |
| 14:49 | 為著欲互彼間厝得著清氣，著取兩隻鳥仔、柏香柴、朱紅色的紗，及牛膝草； |
| 14:50 | 著佇貯活水的粗瓷的器具頂面刣其中的一隻鳥仔。 |
| 14:51 | 然後，祭司著提柏香柴、牛膝草、朱紅色的紗，及彼隻活鳥，浸佇彼隻刣死的鳥仔的血及活水內面，給彼間厝灑七遍。 |
| 14:52 | 伊著用彼隻鳥仔的血、活水、活鳥、柏香柴、牛膝草，及朱紅色的紗，潔淨彼間厝。 |
| 14:53 | 毋拘伊著將彼隻活鳥放去城外的野地；按呢，伊給彼間厝行潔淨禮，彼間厝就清氣。 |
| 14:54 | 以上是有關痲瘋病、粒仔、 |
| 14:55 | 衫及厝生菇、 |
| 14:56 | 皮膚腫、生癬、白斑所立的條例， |
| 14:57 | 用來教導人知什麼是清氣，什麼是無清氣。這是關係痲瘋病的條例。 |