| 章節 | 現代台語漢字2021版經文 |
| 22:1 | 天使閣報我看活命水的河，親像水晶赫呢光亮，對上帝及羊羔的寶座遐流出來， |
| 22:2 | 通過城中心的街路。河的雙旁有活命樹，會結果子十二遍，逐個月結一遍，樹葉會做醫治列邦的路用。 |
| 22:3 | 城內攏𣍐閣有咒詛。 上帝及羊羔的寶座會佇城內；伊的僕人會敬拜伊， |
| 22:4 | 嘛會看見伊的面；伊的名會寫佇𪜶的頭額。 |
| 22:5 | 𣍐閣有暝時；𪜶無需要燈的光抑是日頭，因為主上帝會給𪜶照光，𪜶會永永遠遠掌權。 |
| 22:6 | 基督來臨 天使給我講：「諸個話真實可靠。彼位感動眾先知的主上帝有差伊的天使將一定隨時會發生的代誌指示伊的眾僕人。」 |
| 22:7 | 耶穌講：「看啊，我連鞭來。遵守此本冊預言的話的人真有福氣！」 |
| 22:8 | 我約翰，就是親身有聽見閣看見諸個事彼個人。我聽著閣看著了後，就仆落去佇將諸個事指示我的天使腳前欲給伊拜。 |
| 22:9 | 不過伊給我講：「絕對毋通！我及你，以及及你平平做兄弟的先知及遵守此本冊的話的人，攏平平做僕人。你著拜上帝！」 |
| 22:10 | 伊閣給我講：「毋通將此本冊預言的話封密，因為預言實現的時刻近啦。 |
| 22:11 | 互不義的人繼續做不義；互污穢的人繼續污穢；互義的人繼續實行公義；互聖潔的人繼續聖潔。」 |
| 22:12 | 耶穌講：「看啊，我連鞭來！我欲帶報賞來，照逐個人的行為給伊回報。 |
| 22:13 | 我是阿爾法及亞米茄，是起頭及煞尾，是開始及結束。」 |
| 22:14 | 將長袍洗清氣許個人真有福氣，𪜶有得著權通食活命樹的果子，閣通對諸個門入城。 |
| 22:15 | 許個狗類、行邪術的、淫亂的、刣死人的、拜偶像的，及一切愛講白賊閣做事奸詐的，攏著留佇城外。 |
| 22:16 | 「我 — 耶穌已經差我的天使，佇諸個教會將諸個事對恁作證。我是大闢的根，是伊的後代，是光亮的啟明星。」
|
| 22:17 | 聖神及新娘攏講：「來！」
聽見的人著講：「來！」 嘴焦的人著來！ 意愛的人通白白領受活命水。 |
| 22:18 | 我給逐個聽著此本冊預言的話的人警告：若有人給伊加添，上帝會將此本冊所記的災禍加添互伊。 |
| 22:19 | 若有人刪除此本冊預言的話，上帝嘛會對此本冊所記活命樹及聖城的福分刪除伊的份額。 |
| 22:20 | 為著諸個事作證彼位講：「著，我連鞭來！」 阿們！主耶穌啊，請來！ |
| 22:21 | 願主耶穌的恩典及恁大家同在！ |