| 章節 | 現代台語漢字2021版經文 |
| 19:1 | 後來，我有聽見佇天頂親像有一大群人大聲啲喝：
哈利路亞，稱讚上主！ 拯救、榮光、權能攏對咱的上帝來！ |
| 19:2 | 伊的審判真實公義；
因為伊有審判彼個用淫行敗壞地上人類的大淫婦， 有刑罰伊流上帝僕人的血的罪。 |
| 19:3 | 𪜶第二遍喝：
哈利路亞，稱讚上主！ 城著火燒的煙淐高永遠𣍐停。 |
| 19:4 | 彼二十四個長老及彼四個活物仆落去敬拜坐佇寶座的上帝，講：
阿們。哈利路亞！ |
| 19:5 | 羊羔的婚宴 對寶座有聲出來，講： 所有上帝的僕人， 所有敬畏上帝的人， 無論卑賤尊貴， 攏著稱讚咱的上帝！ |
| 19:6 | 我閣聽見親像一大群人的聲，親像真多條河流的聲，親像雷大彈的聲，講：
哈利路亞，稱讚上主！ 因為咱的主，全能的上帝作王啦！ |
| 19:7 | 咱著歡喜快樂，
將榮光歸互伊！ 因為羊羔婚禮的日到啦； 伊的新娘已經準備好勢啦。 |
| 19:8 | 上帝已經互新娘穿幼麻布
光亮清白的衫。 幼麻布的衫是信徒義的行為。 |
| 19:9 | 後來，天使給我講：「你著寫起來；受邀請參加羊羔婚宴的人真有福氣！」 天使閣給我講：「諸個是上帝真實的話。」 |
| 19:10 | 我就仆佇天使的腳前欲給伊拜。毋拘伊給我講：「絕對毋通！我及你，以及許個持守耶穌見證的人攏平平做僕人；你著拜上帝！」 因為耶穌的見證是先知受感動所講信息的中心。 |
| 19:11 | 騎白馬的人 後來，我看見天開，看著一隻白馬。騎佇馬頂的叫做「忠信」及「真實」；伊照公義審判及作戰。 |
| 19:12 | 伊的目睭親像火焰；頭殼有戴真多王冠；身軀有寫一個名，此個名伊家己以外無人識。 |
| 19:13 | 伊穿沐著血的長袍，伊的名叫做上帝的道。 |
| 19:14 | 天軍穿幼麻布的長袍，白閣清氣，騎白馬啲隨伊。 |
| 19:15 | 對伊的嘴吐出一支利劍，欲用來拍敗列國；伊欲用鐵柺治理𪜶；伊嘛欲踏全能的上帝的酒窟，互伊的大受氣發出。 |
| 19:16 | 佇伊的長袍及大腿有寫一個名「萬王的王，萬主的主」。 |
| 19:17 | 我有閣看見一個天使徛佇日頭頂，大聲對許個佇空中啲飛攏總的飛鳥喝：「來！聚集來赴上帝的大宴席！ |
| 19:18 | 來食諸個君王的肉、將軍的肉、勇士的肉、諸個馬及騎馬的人的肉，嘛食攏總自由的人及奴隸的肉、卑賤及尊貴的人的肉。」 |
| 19:19 | 我有閣看見彼隻獸，地上的君王及𪜶的軍隊聚集欲及彼位騎白馬的以及伊的軍隊交戰。 |
| 19:20 | 彼隻獸受掠，彼個假先知，就是前曾佇獸的面前行奇蹟的，嘛及獸做夥受掠。此個假先知曾用奇蹟迷惑許個有獸的記號及曾拜獸的像的人。彼隻獸及彼個假先知兩個攏互人活活㧒落硫磺啲𤏸的火湖。 |
| 19:21 | 所賰的軍隊攏互彼位騎馬的的嘴吐出的劍殺害；所有的鳥攏來食𪜶的肉，食到飽。 |