| 章節 | 現代台語漢字2021版經文 |
| 18:1 | 巴比倫的倒壞 後來，我有看見另外一個天使對天頂落來。伊有大權柄；伊的榮光互地上光起來。 |
| 18:2 | 伊大聲喝：
倒落去啦！大巴比倫倒落去啦！ 此個城成做鬼徛起的所在： 一切污穢的神的監牢， 一切污穢的鳥的鳥籠， 一切污穢閣可惡的野獸的籠仔。 |
| 18:3 | 因為列國攏有飲著此個淫婦淫亂的酒引起上帝大受氣，
地上的君王攏有及伊行淫， 地上的生理人攏有對伊的奢華放蕩發大財。 |
| 18:4 | 我閣有聽見另外一個聲對天頂出來，講：
我的子民啊，出來，著對淫婦遐出來， 才免沐著伊的罪， 才免互伊的災禍連累著。 |
| 18:5 | 因為伊的罪已經累積抵天，
上帝會記得伊的邪惡。 |
| 18:6 | 伊按怎對待人，著照按呢對待伊，
照伊的所做加倍給伊報應， 用伊調和酒的杯調和加倍的酒互伊！ |
| 18:7 | 伊曾按怎榮光家己，按怎奢華，
著照按呢互伊痛苦悲傷。 因為伊心內家己講： 我坐佇寶座作女王； 我毋是寡婦， 絕對𣍐抵著作寡婦的悲傷。 |
| 18:8 | 所以，佇一日內災禍會到，
會有死亡、悲傷、飢荒。 伊會互火燒滅， 因為審判伊的主上帝有大氣力。 |
| 18:9 | 及伊行淫，過奢華生活諸個地上的君王，看著城著火燒的煙，會為著城悲傷啼哭。 |
| 18:10 | 𪜶看著城所受的艱苦真驚惶，攏徛遠遠，講：
慘啊，此個大城！ 巴比倫此個堅固的城慘啊！ 因為無偌久，你就會受著審判！ |
| 18:11 | 地上的生理人為著伊啼哭哀傷，因為無人閣買𪜶的貨， |
| 18:12 | 就是金、銀、寶石、真珠；幼麻布、絲綢、高貴的紫色及紅色布料；逐種香柴、逐款象牙製品、逐款貴氣的木材製品、銅器、鐵器，及大理石製品； |
| 18:13 | 肉桂、芳料、香、乳香；酒、橄欖油、幼麵粉、麥；牛、羊、馬、馬車、奴隸，以及人。 |
| 18:14 | 諸個生理人對伊講：
你的心所意愛許個好物攏無去； 你的榮華富貴攏消失， 永遠𣍐當閣看著。 |
| 18:15 | 靠此個城做生理發大財的生理人，因為看著此個城所受的苦楚真驚惶，攏會徛遠遠悲傷啼哭， |
| 18:16 | 講：
慘啊，慘啊，此個大城！ 你慣勢穿幼麻布、 高貴的紫色及紅色布料的衫， 掛金、寶石，及真珠做妝飾。 |
| 18:17 | 一時仔久，所有的財富攏無去。 所有的船長、旅客、水手，及所有靠海生活的人，徛遠遠， |
| 18:18 | 看著城著火燒的煙，攏喝：
有叨一個城親像此個大城？ |
| 18:19 | 𪜶糝土粉佇家己的頭殼頂，啼哭悲傷大聲喝：
慘啊，慘啊，此個大城！ 佇海裡行船的人攏靠此個城的財富發財。 因為一時仔久，伊的一切攏無去。 |
| 18:20 | 天啊，著為著此個城歡喜！
恁諸個信徒、使徒，及先知著歡喜， 因為上帝已經有替恁申冤，給伊刑罰啦！ |
| 18:21 | 後來，有一個大氣力的天使夯一塊石，親像大石磨，給伊㧒落海，講：
大巴比倫城嘛會親像按呢， 互人大力給伊㧒落去， 永遠𣍐閣看見。 |
| 18:22 | 彈琴、唱歌、
歕簫、歕喇叭的聲， 你嘛𣍐閣聽見； 逐種工藝師傅， 你嘛𣍐閣看見； 挨磨的聲， 你嘛𣍐閣聽見； |
| 18:23 | 燈火的光，
𣍐閣給你照； 新子婿及新娘的聲， 你𣍐閣聽見； 因為你的生理人以前佇地上是有勢力的人， 因為你有用邪術迷惑萬國。 |
| 18:24 | 先知，及信徒，
以及所有佇地上受刣的人的血， 佇此個城逐所在攏看會著。 |