| 章節 | 現代台語漢字2021版經文 |
| 17:1 | 大淫婦及獸 許個提七塊碗的七個天使的一個來及我講話，講：「來，我欲互你看坐佇河流頂面彼個大淫婦所著受的審判。 |
| 17:2 | 地上的君王曾及伊行淫；地上的住民嘛曾飲伊淫亂的酒飲到酒醉。」 |
| 17:3 | 我受聖神感動，互天使導去曠野。我有看見一個婦仁人坐佇一隻朱紅色，閣充滿褻瀆的名號的獸頂面；此隻獸有七個頭，十支角。 |
| 17:4 | 此個婦仁人穿紫色及朱紅色的衫，用金、寶石，及真珠妝飾，手提金杯，貯滿可惡的物及淫亂的污穢。 |
| 17:5 | 伊的頭額有寫一個名，有隱密的意思，就是「大巴比倫，地上淫婦及可惡的物的老母」。 |
| 17:6 | 我看見彼個婦仁人飲信徒的血及為著耶穌做見證的殉道者的血，飲到醉。 我看著伊的時大著驚。 |
| 17:7 | 天使就給我講：「是按怎著驚？我欲將此個婦仁人及伊所騎彼隻有七個頭十支角的獸的祕密給你講。 |
| 17:8 | 你所看著彼隻獸，過去有、現在無，啲欲閣對無底深坑起來，最後滅亡。地上的住民，對創世以來，𪜶的名無記佇活命冊的，看著彼隻獸會著驚奇怪，因為彼隻獸過去有、現在無，後來會閣出現。 |
| 17:9 | 「此個代誌著用智慧來理解。彼七個頭就是婦仁人所坐的七座山，𪜶嘛是七個王。 |
| 17:10 | 其中五個已經倒落去，一個猶佇啲，另外一個猶未來，若來伊一定暫時留啲若定。 |
| 17:11 | 過去有、現在無彼隻獸就是第八個王，是七個王中間的一個，伊嘛會滅亡。 |
| 17:12 | 「你所看著的十支角就是彼十個猶毋曾統治的王；毋拘𪜶會得著權作王及獸做夥統治一點鐘久。 |
| 17:13 | 此十個王同意將𪜶的能力及權柄交互彼隻獸。 |
| 17:14 | 𪜶欲及羊羔交戰，毋拘羊羔會刣贏諸個王，因為伊是萬主的主、萬王的王；及伊做夥許個受呼召，受揀選，忠實的人嘛會得勝。」 |
| 17:15 | 天使閣給我講：「你所看著彼個淫婦坐啲的河流就是逐個民族、逐個族群、逐個邦國，及講逐款語言的人。 |
| 17:16 | 你所看著彼十支角及彼隻獸會怨恨彼個淫婦，嘛會互伊無依倚，赤身露體；𪜶會吞食伊的肉，閣用火給伊燒滅。 |
| 17:17 | 因為上帝將執行伊的旨意的意念下佇彼十個王的心，互𪜶同心將𪜶的國交互彼隻獸，直到上帝的話應驗。 |
| 17:18 | 你所看著彼個婦仁人就是啲掌管地上許個君王的彼座大城。」 |