| 章節 | 現代台語漢字2021版經文 |
| 13:1 | 兩隻獸 後來，我有看見一隻獸對海裡起來；伊有十支角，七個頭；十支角有戴十頂王冠；逐個頭殼頂攏有謗瀆上帝的名號。 |
| 13:2 | 我所看見彼隻獸親像豹；伊的腳親像熊的腳，嘴親像獅的嘴。彼隻惡龍將家己的能力、王座，及大權柄交互彼隻獸。 |
| 13:3 | 獸的一個頭殼親像有受著致命的重傷，毋拘伊的致命傷有得著醫好。通世界的人攏感覺真希奇，去隨佇獸的後面。 |
| 13:4 | 𪜶攏拜彼隻惡龍，因為惡龍有將伊的權柄交互獸；𪜶嘛拜獸，講：「啥人會當及此隻獸相比？啥人會當及伊交戰？」 |
| 13:5 | 後來，此隻獸有得著一個講大話及褻瀆的嘴；伊得著允准通執行權柄四十二月日久。 |
| 13:6 | 伊開嘴褻瀆上帝，褻瀆伊的名及伊的布棚，就是許個搭布棚佇天頂的人。 |
| 13:7 | 伊嘛得著允准通攻擊信徒，給𪜶征服；伊閣得著權通治理逐個族群、逐個民族、逐個邦國，及講逐款語言的人。 |
| 13:8 | 所有住佇地上的人，對創造世界以來，𪜶的名無記佇受刣羊羔的活命冊的，攏會拜彼隻獸。
|
| 13:9 | 有耳孔的攏著聽：
|
| 13:10 | 彼個應該受掠的著受掠；
彼個應該受殺害的著受刀殺害。 因為按呢，信徒著有耐心及信心。 |
| 13:11 | 後來，我閣看見有一隻獸對地裡起來；伊有兩支角親像羊的角，講話親像惡龍。 |
| 13:12 | 伊佇頭一隻獸的面前執行頭一隻獸的權柄。伊叫地及住佇地上的人去拜頭一隻獸，就是受著致命傷閣得著醫好彼隻獸。 |
| 13:13 | 伊行大奇蹟，佇人的面前叫火對天降落地； |
| 13:14 | 閣用受允准佇獸的面前行的奇蹟來迷惑地上的人，吩咐𪜶著給彼隻受刀傷猶活啲的獸造一座像。 |
| 13:15 | 伊閣受允准將活氣歕入去獸的像，互獸的像會講話，閣殺害所有無拜獸的像的人。 |
| 13:16 | 伊嘛強迫眾人，無論大細、好額散赤、自由的作奴隸的，佇𪜶家己的正手抑是頭額蓋印做記號。 |
| 13:17 | 無蓋獸的名，抑是無代表伊的名的數字的，就𣍐當買賣。 |
| 13:18 | 對此個代誌著有智慧。聰明的人著算出獸的數字，因為數字代表一個人的名，此個數字是六百六十六。 |