| 章節 | 現代台語漢字2021版經文 |
| 8:1 | 第七個封印及金香爐 羊羔開第七個封印的時，天靜靜約半點鐘久。 |
| 8:2 | 後來我有看見七個天使徛佇上帝面前，𪜶有領受七支喇叭。 |
| 8:3 | 閣有一個天使來，手提金香爐徛佇祭壇前，領受真多香，通及眾信徒的祈禱做夥獻佇寶座前的金祭壇頂。 |
| 8:4 | 香的煙及信徒的祈禱對天使的手淐到上帝面前。 |
| 8:5 | 然後，天使提香爐，貯滿祭壇頂的火，給伊㧒落地，隨時有彈雷、響聲、熠爁，及地動。 |
| 8:6 | 七支喇叭 攑七支喇叭的七個天使準備好勢欲歕。 |
| 8:7 | 頭一個天使歕伊的喇叭，隨時有雹及火，摻血㧒落地；地的三分一燒去，樹木的三分一燒去，所有青翠的草攏燒去。 |
| 8:8 | 第二個天使歕伊的喇叭，隨時有親像火啲燒的大山㧒落海；海的三分一變做血； |
| 8:9 | 海裡的活物三分一死去；船隻的三分一損壞。 |
| 8:10 | 第三個天使歕伊的喇叭，隨時有一粒大粒星對天頂落落來，親像啲𤏸的火把落佇三分一的江河及所有的水泉。 |
| 8:11 | 此粒星的名叫做苦艾。三分一的水變苦，真多人因為此個水死去，因為水變苦。 |
| 8:12 | 第四個天使歕伊的喇叭，日的三分一，月的三分一，星的三分一攏受攻擊，致到日、月、星的三分一變暗，日時三分一無光，暝時嘛三分一無光。 |
| 8:13 | 後來我看，有聽見一隻佇空中啲飛的鷹鳥大聲叫講：「慘啊！慘啊！住佇地上的人慘啊！因為其他的三個天使啲欲歕喇叭啦。」 |