| 章節 | 現代台語漢字2021版經文 |
| 6:1 | 開封印 羊羔開七個封印的一個的時，我閣看，我有聽見四個活物的一個，伊的聲親像雷的聲，講：「來！」 |
| 6:2 | 我看的時，有看著一隻白馬，騎馬的人攑弓；伊領受花冠出發，為著欲百戰百勝。 |
| 6:3 | 羊羔開第二個封印的時，我有聽見第二個活物講：「來！」 |
| 6:4 | 彼時有別隻馬出來，是赤色的；騎馬的人有領受權柄通對地上搶奪和平，互人互相殘殺；伊有閣領受一支大支劍。 |
| 6:5 | 羊羔開第三個封印的時，我有聽見第三個活物講：「來！」我看的時，有看著一隻烏馬，騎馬的人手提秤仔。 |
| 6:6 | 我聽見假若有聲對四個活物中間發出講：「一日的工錢只有通買一公升小麥；一日的工錢只有通買三公升大麥；橄欖油及酒毋通拍損。」 |
| 6:7 | 羊羔開第四個封印的時，我有聽見第四個活物講：「來！」 |
| 6:8 | 我看的時，有看著一隻火灰色的馬，騎馬的人名叫做死亡，陰府隨佇後面；𪜶有領受權柄通管轄地上四分一的土地，用刀劍、飢荒、瘟疫，及地上的野獸去殺害人。 |
| 6:9 | 羊羔開第五個封印的時，我看見祭壇下有為著上帝的話及為著做見證受殺害的人的靈魂。 |
| 6:10 | 𪜶大聲喉叫講：「聖閣真的主宰啊，著閣偌久你才欲審判地上的人，通為著阮所流的血申冤？」 |
| 6:11 | 逐個人就領受一領白衫，閣有聲給𪜶講，著閣聽候一時仔久，到平平做僕人的人以及𪜶的兄弟姊妹，就是啲欲及𪜶像款受殺害的人的數目滿的時。 |
| 6:12 | 後來我看見羊羔開第六個封印的時，忽然地大振動，日頭變做親像烏麻布赫呢烏，月歸個變做親像血赫呢紅； |
| 6:13 | 天頂的星墜落地，親像無花果樹互大風掃振動，猶未熟的果子攏落了了。 |
| 6:14 | 天消失，親像一卷冊捲起來；山及海島攏徙離開原位。 |
| 6:15 | 地上的君王、統治者、將領、有錢的、有勢的、一切做奴隸的，及自由的攏去匿佇洞內及山巖中間的縫。 |
| 6:16 | 𪜶向山嶺及山巖喝講：「倒落來給阮蓋啲，互阮通閃避坐佇寶座彼位的面及羊羔的受氣。 |
| 6:17 | 因為𪜶受刑罰的大日子到啦，什麼人徛會牢？」 |