| 章節 | 現代台語漢字2021版經文 |
| 1:1 | 這是耶穌基督的啟示。上帝互伊此個啟示，愛伊將一定隨時會發生的代誌指示上帝的眾僕人。基督有差遣伊的天使去指示伊的僕人約翰。 |
| 1:2 | 約翰為著上帝的信息及耶穌基督的見證，就是伊所看見的一切來作證。 |
| 1:3 | 讀此本冊的人真有福氣；聽見此個預言閣遵守冊裡所記載的人真有福氣；因為時機近啦。 |
| 1:4 | 對七個教會請安 我約翰寫批互亞細亞的七個教會，講： 願現在存在、過去存在、將來嘛存在的上帝，及伊座位前的七個神，以及耶穌基督，賜恁恩典及平安！基督是忠信的見證人，頭一個對死人中閣活，是地上萬王的主宰。 伊疼咱，為著咱流血犧牲來解放咱脫離罪， |
| 1:5 | 併於上節 |
| 1:6 | 互咱成做一個國度，作祭司來服事伊的父上帝。願榮光及權能歸佇耶穌基督，直到永永遠遠。阿們！
|
| 1:7 | 你看，伊坐雲啲來，
眾人會看見伊， 連用槍鑿伊的人嘛會看見。 地上萬族攏會因為伊啼哭。 此個事一定會發生。阿們！ |
| 1:8 | 現在存在、過去存在、將來嘛存在的全能的主上帝講：「我是阿爾法，是亞米茄。」 |
| 1:9 | 基督對約翰顯現 我是約翰，是恁的兄弟，及恁做夥分擔耶穌的患難及吞忍，閣有份佇伊的統治。為著傳上帝的信息及耶穌的見證，我曾住佇一個名叫做拔摩的海島。 |
| 1:10 | 有一個主日，我受聖神感動，聽見佇我的後面有大的聲親像喇叭啲響， |
| 1:11 | 講：「你著將所看見的寫做冊，寄互以弗所、士每拿、別迦摩、推雅推喇、撒狄、非拉鐵非，及老底嘉此七個教會。」 |
| 1:12 | 我越轉身欲看對我講話的是什麼人，一下越轉身，有看著七支金燈台。 |
| 1:13 | 燈台的中央有一位親像人子，穿一領垂落到腳的長袍，胸坎縖金帶。 |
| 1:14 | 伊的頭及頭毛親像羊毛赫呢白，親像雪赫呢白；伊的目睭親像火焰。 |
| 1:15 | 伊的腳親像過火爐鍛鍊光亮的銅；伊的聲親像大水啲瀧的聲。 |
| 1:16 | 伊的正手提七粒星；伊的嘴吐出雙面利的劍；伊的面親像炎熱的日頭發光。 |
| 1:17 | 我一下看著伊，就仆佇伊腳前親像死去的人。伊用正手按我，講：「毋免驚！我是起頭的，嘛是煞尾的。 |
| 1:18 | 我是活的。我有死，現在啲活，會永永遠遠活啲。我有死亡及陰府的鎖匙。 |
| 1:19 | 所以，你著將所看見的，以及現在所啲發生，及以後會發生的代誌攏寫起來。 |
| 1:20 | 你所看著我正手提彼七粒星及七支金燈台的奧妙是按呢：七粒星是七個教會的天使；七支燈台是七個教會。」 |