| 章節 | 現代台語漢字2021版經文 |
| 4:1 | 真神及假神 親愛的朋友，毋通相信逐個神；著察驗諸個神是對上帝來抑毋是，因為有真多假先知已經出現佇此世間。 |
| 4:2 | 恁通用按呢來認識上帝的神：宣認耶穌基督成做人來世間彼位神是對上帝來的； |
| 4:3 | 毋宣認耶穌許個神毋是對上帝來的。這是基督的敵對者的神，恁有聽著伊啲欲來，現在已經佇世間。 |
| 4:4 | 少年朋友，恁是屬上帝，閣已經贏過假先知，因為𫢶佇恁內面的聖神比𫢶佇世間人內面的神較強較大。 |
| 4:5 | 假先知是屬世間，講世間事，所以世間人會聽𪜶。 |
| 4:6 | 咱是屬上帝。識上帝的人會聽咱；無屬上帝的人毋聽咱。對此個，咱認識真理的神及迷惑人的神。 |
| 4:7 | 上帝是疼 親愛的朋友，咱著相疼，因為疼是對上帝來。有疼的人是上帝的子兒，嘛識上帝。 |
| 4:8 | 無疼的人毋識上帝，因為上帝是疼。 |
| 4:9 | 上帝差伊獨一的子來到世間，欲互咱對伊得著活命；對此個，上帝的疼顯明佇咱中間。 |
| 4:10 | 毋是咱疼上帝，是伊有疼咱，差伊的子做贖罪祭來贖咱的罪。這就是疼。 |
| 4:11 | 親愛的朋友，上帝若赫呢疼咱，咱嘛著相疼。 |
| 4:12 | 無人曾看見上帝，咱若相疼，上帝就𫢶佇咱內面，伊的疼通過咱完全實現出來。 |
| 4:13 | 上帝已經有將伊的聖神賜互咱，對此個咱知咱𫢶佇上帝內面，伊嘛佇咱內面。 |
| 4:14 | 父差伊的子來做世間的救主，阮有看著，現在做見證。 |
| 4:15 | 宣認耶穌是上帝的子的人，上帝𫢶佇伊內面，伊嘛佇上帝內面。 |
| 4:16 | 所以，咱知閣信上帝有疼咱。 上帝是疼，有啲實行疼的人𫢶佇上帝內面，上帝嘛𫢶佇伊內面。 |
| 4:17 | 對按呢，疼佇咱中間完全實現出來，互咱佇審判的日通勇敢毋免驚，因為咱佇此世間及基督仝款。 |
| 4:18 | 有疼就無驚惶；完全的疼趕出驚惶。因為有驚惶就有刑罰；有驚惶的人，疼猶無完全實現出來。 |
| 4:19 | 咱著相疼，因為上帝有代先疼咱。 |
| 4:20 | 若有人講「我疼上帝」，毋拘怨恨兄弟抑是姊妹，伊是白賊。因為，無疼有看著的兄弟抑是姊妹，哪會疼無看著的上帝。 |
| 4:21 | 疼上帝嘛著疼家己的兄弟抑是姊妹，這是咱對基督領受的誡命。 |