| 章節 | 現代台語漢字2021版經文 |
| 3:1 | 上帝的子兒 恁想看咧，父偌仔呢疼咱，互咱通稱做伊的子兒；事實咱就是。世間人毋識咱，因為𪜶毋識上帝。 |
| 3:2 | 親愛的朋友，現在咱是上帝的子兒，將來會按怎猶未明顯。毋拘咱知，基督顯現的時，咱會親像伊，因為咱會看見伊的真像。 |
| 3:3 | 基督是純潔，所以對基督有此款向望的人會家己保持純潔。 |
| 3:4 | 人犯罪是違背上帝的律法，因為罪是違背上帝的律法。 |
| 3:5 | 恁知基督顯現是欲除去人的罪，毋拘伊本身無罪。 |
| 3:6 | 及基督保持密切關係的人𣍐繼續犯罪；繼續犯罪的人毋曾看見基督，嘛毋識伊。 |
| 3:7 | 少年朋友，毋通受迷惑。基督是義人，所以實行公義的才是義人。 |
| 3:8 | 繼續犯罪的人屬魔鬼，因為魔鬼對起頭就犯罪。上帝的子顯現的目的是欲破壞魔鬼的作為。 |
| 3:9 | 對上帝生的𣍐繼續犯罪，因為上帝的活命佇𪜶內面；𪜶𣍐繼續犯罪，因為𪜶是對上帝生的。 |
| 3:10 | 對按呢，什麼人是上帝的子兒抑是魔鬼的子兒真清楚：無實行公義，無疼兄弟姊妹的，毋是上帝的子兒。 |
| 3:11 | 著相疼 咱著相疼；這是恁對起頭所聽著的信息。 |
| 3:12 | 咱毋通親像該隱；伊屬邪惡者，有刣死家己的小弟。伊哪會刣死小弟？因為伊的行為邪惡，毋拘小弟的行為正直。 |
| 3:13 | 兄弟姊妹，世間人若怨恨恁，恁毋免奇怪。 |
| 3:14 | 咱知，咱已經出死入活，因為咱有疼兄弟姊妹。無疼人的是𫢶佇死的管轄下。 |
| 3:15 | 怨恨兄弟抑是姊妹就是刣人；恁嘛知，刣人的，永遠的活命無𫢶佇伊內面。 |
| 3:16 | 基督為著咱犧牲性命，對按呢咱知什麼是疼；按呢咱嘛愛為著兄弟抑是姊妹犧牲性命。 |
| 3:17 | 若有好額人看著兄弟抑是姊妹有欠缺亦無同情憐憫，哪會當講伊有疼上帝？ |
| 3:18 | 少年朋友，相疼毋通只有用話抑是用嘴講，著實實在在實行。 |
| 3:19 | 佇上帝面前勇敢免驚 對按呢咱知咱屬真理。咱若受良心責備，佇上帝的面前咱會當安穩自在，因為伊的心比咱的心閣較寬大，伊逐項攏知。 |
| 3:20 | 併於上節 |
| 3:21 | 親愛的朋友，咱的良心若無給咱責備，咱佇上帝面前就通勇敢毋免驚。 |
| 3:22 | 咱無論對伊求什麼攏會得著，因為咱遵守伊的誡命，佇伊面前做伊所歡喜的事。 |
| 3:23 | 伊的誡命是按呢：咱著信伊的子耶穌基督的名，嘛著照伊互咱的命令相疼。 |
| 3:24 | 遵守上帝誡命的人𫢶佇伊內面，伊嘛佇𪜶內面。對上帝賜互咱的聖神咱知上帝𫢶佇咱內面。 |