| 章節 | 現代台語漢字2021版經文 |
| 1:1 | 活命的道 阮欲給恁說明創世以前就存在彼個活命的道；此個道阮有聽著，有親目看著，有詳細看著，嘛有親手摸著。 |
| 1:2 | 此個活命已經顯現；阮有看著，現在做見證，閣對恁宣布原來及父同在閣已經有對阮顯現此個永遠的活命。 |
| 1:3 | 阮看著閣聽著的，現在嘛對恁宣布，是欲互恁嘛通及阮有團契；此個團契是阮及父及伊的子耶穌基督中間的團契。 |
| 1:4 | 阮寫諸個是欲互咱有圓滿的歡喜。 |
| 1:5 | 上帝是光 阮對上帝的子聽著，現在傳互恁的信息是按呢：上帝是光，佇伊完全無烏暗。 |
| 1:6 | 咱若講咱及伊有團契，猶久繼續佇烏暗中生活，是講白賊，無實行真理。 |
| 1:7 | 毋拘，上帝佇光明中，咱若照按呢佇光明中生活，咱就互相有團契，伊的子耶穌的血會繼續洗清咱攏總的罪。 |
| 1:8 | 咱若講咱無罪，是騙家己，真理無佇咱內面。 |
| 1:9 | 咱若承認咱的罪，上帝是信實公義，欲赦免咱的罪，洗清咱攏總的不義。 |
| 1:10 | 咱若講咱毋曾犯罪，是給上帝看做白賊，伊的道無佇咱內面。 |