| 章節 | 現代台語漢字2021版經文 |
| 2:1 | 假教師 以前嘛有假先知佇民間出現；仝款，現在嘛有假教師會佇恁中間出現。𪜶暗中將互人滅亡的異端帶入來，甚至毋承認彼位贖回𪜶的主宰，致到家己真緊就滅亡。 |
| 2:2 | 毋拘猶有真多人學𪜶淫亂的生活，致到真理的道路因為𪜶受誹謗。 |
| 2:3 | 諸個假教師因為貪心，會用捏造的故事諞恁的財物。對此款人的定罪早就決定；𪜶真緊就滅亡。 |
| 2:4 | 上帝無寬容犯罪的天使，給𪜶擲落地獄，關佇烏暗的深坑，聽候審判。 |
| 2:5 | 上帝嘛無寬容古代的世界，用大水淹滅無敬畏上帝的世間人，只有救宣揚公義的挪亞及其他七個人。 |
| 2:6 | 上帝處罰所多瑪及蛾摩拉的城市，用火毀滅𪜶，互無敬畏上帝的人做警戒。 |
| 2:7 | 上帝有救義人羅得，因為羅得為著邪惡的人淫亂的所做操心。 |
| 2:8 | 彼個義人羅得𫢶佇𪜶中間，逐日有聽見閣看著許個邪惡的代誌，伊正義的心非常痛苦。 |
| 2:9 | 主知按怎救敬虔的人脫離試煉，嘛知給不義的人留到審判的日受刑罰，特別是許個放縱肉體的情慾及藐視上帝權威的人。 諸個假教師大膽閣驕傲，甚至敢侮辱尊貴的眾天使。 |
| 2:10 | 併於上節 |
| 2:11 | 許個天使的氣力及能力雖然比假教師較大，嘛無佇主的面前用侮辱的話給𪜶控告。 |
| 2:12 | 毋拘，諸個人及出世就趁本能啲活，欲互人掠去刣的野獸仝款，𪜶誹謗家己毋識的事；野獸毀滅，𪜶嘛會按呢受毀滅， |
| 2:13 | 受著家己不義的行為應得的報應。𪜶看佇日時沉迷佇情慾做享樂。𪜶及恁做夥飲食的時，大食大飲，放縱宴樂，完全失態。 |
| 2:14 | 𪜶的目睭只有愛看邪淫，無犯罪擋𣍐牢。𪜶引誘意志薄弱的人。𪜶的心只有想貪財。𪜶是上帝咒詛的人！ |
| 2:15 | 𪜶離開正路，行迷路，行比珥的子巴蘭所行的路。巴蘭貪愛不義的錢財， |
| 2:16 | 為著所犯的罪受責備。一隻𣍐講話的驢仔竟然用人的聲阻止先知巴蘭瘋狂的想法。 |
| 2:17 | 諸個人親像焦去的水泉，親像互大風吹散的雲霧；上帝已經有給𪜶佇烏暗的深淵留一個所在。 |
| 2:18 | 𪜶講空洞的戇話，用𣍐當控制的肉體的情慾，引誘已經脫離失迷生活的人。 |
| 2:19 | 𪜶答應互人自由，毋拘家己做腐敗生活的奴隸；因為人受什麼控制，就成做彼個的奴隸。 |
| 2:20 | 人認識咱的主— 救主耶穌基督脫離世間的腐敗以後，若閣互腐敗的勢力纏啲閣壓制，此款的結局會比以前閣較僫。 |
| 2:21 | 𪜶認識公義的道路，然後離開所傳授互𪜶神聖的誡命，按呢寧可對起頭就毋識較好。 |
| 2:22 | 𪜶的情形抵親像俗語所講「狗越轉來食家己吐出來的物」，抑是「豬洗清氣以後隨時閣去翱路糊糜」。 |