| 章節 | 現代台語漢字2021版經文 |
| 4:1 | 改變的生活 基督既然佇肉體受苦，恁嘛著用仝款的心志來裝備家己，因為佇肉體受苦是及罪惡斷絕關係。 |
| 4:2 | 按呢，恁佇世間所賰的日子就無閣照人的情慾，是照上帝的旨意來活。 |
| 4:3 | 恁有浪費光陰做未信者所愛做的事，淫亂、色慾、酒醉、宴樂、大食大飲，及可惡的偶像崇拜等，已經夠額啦。 |
| 4:4 | 𪜶看見恁無閣及𪜶過放蕩無節制的生活，就奇怪煞給恁誹謗。 |
| 4:5 | 𪜶著對啲欲審判活人及死人的上帝交賬。 |
| 4:6 | 為著此個緣故，福音甚至嘛有傳互死去的人，互𪜶的肉體雖然著照一般人的款受審判，毋拘𪜶的靈會當照上帝的款來活。 |
| 4:7 | 作上帝恩賜的好管家 萬有的終局近啦！所以，著謹慎守己，通警醒祈禱。 |
| 4:8 | 上要緊的，是著熱切相疼，因為疼會遮蓋真多罪過。 |
| 4:9 | 著互相好款待，毋通埋怨。 |
| 4:10 | 作上帝所賜逐項恩賜的好管家，著照逐個人所得著的恩賜互相服務。 |
| 4:11 | 講道理的，著講上帝的信息；侍奉的，著照上帝所賜恩賜的力量來侍奉，互上帝通過耶穌基督佇萬事得著榮耀。願榮光權柄攏歸伊，直到永永遠遠。阿們！ |
| 4:12 | 為著作基督徒忍受苦難 親愛的兄弟姊妹，恁抵著親像火的試煉，毋通若準抵著奇怪的事； |
| 4:13 | 反轉著因為有分擔基督的苦難來歡喜，互恁佇伊榮耀顯現的時嘛通歡喜快樂。 |
| 4:14 | 恁若為著基督的名受凌辱，恁真有福氣，因為有上帝榮光的神𫢶佇恁身上。 |
| 4:15 | 恁中間毋通有人因為刣人，作賊，作歹，抑是愛管別人的代誌來受苦。 |
| 4:16 | 若因為作基督徒來受苦，毋免見笑，反轉著因為有此個名歸榮光互上帝。 |
| 4:17 | 審判的時到啦！上帝的家著代先受審判；若對咱開始，許個毋信趁上帝福音的人的結局豈𣍐閣較嚴重？ |
| 4:18 | 聖經有講：
義人得救都真， 無敬虔的人及罪人豈𣍐閣較困難？ |
| 4:19 | 所以，許個照上帝的旨意受苦的人，著將家己交託互彼位通信靠的造物主，繼續做好事。 |