| 章節 | 現代台語漢字2021版經文 |
| 5:1 | 警告好額人 呃，恁諸個好額人，注意聽，著為著啲欲受的災難哀傷啼哭！ |
| 5:2 | 恁的財富已經敗壞，恁的衣服已經互蛀蟲咬破。 |
| 5:3 | 恁的金、銀生銹，諸個銹會成做控告恁的證據，閣會親像火燒滅恁的身軀。恁為著終末的日子積聚錢財。 |
| 5:4 | 佇恁的田園為恁做工給恁收割的人，恁無工錢互𪜶。著聽𪜶叫苦的聲！許個收割的工人呼叫的聲，主 — 萬軍的統帥已經有聽著。 |
| 5:5 | 恁佇地上享受奢華宴樂。恁家己食甲肥滋滋，啲等互人刣的日。 |
| 5:6 | 恁給無辜的人定罪，給伊殺害，伊嘛無給恁抵抗。 |
| 5:7 | 忍耐及祈禱 所以，兄弟姊妹，著忍耐到主來臨。恁看，農夫按怎聽候田裡寶貴的收成；伊耐心聽候春霖秋雨。 |
| 5:8 | 恁嘛著忍耐。恁的心著堅定，因為主的來臨近啦。 |
| 5:9 | 兄弟姊妹，毋通互相埋怨，才免受上帝審判。恁看，審判者徛佇門口啦。 |
| 5:10 | 兄弟姊妹，著用許個奉主的名講話的先知做忍受苦難的模樣。 |
| 5:11 | 許個吞忍到尾的人，咱看𪜶做有福氣。恁曾聽見約伯的忍耐，知主最後有按怎給伊照顧，因為主充滿憐憫及慈愛。 |
| 5:12 | 我的兄弟姊妹，上重要的就是，毋通指天、地，抑是什麼物件咒誓。「是」就講「是」，「毋是」就講「毋是」；按呢恁才免受上帝審判。 |
| 5:13 | 恁中間有痛苦的人無？若有，伊著祈禱。恁中間有歡喜的人無？若有，伊著唱稱讚的詩歌。 |
| 5:14 | 恁中間有破病的人無？若有，伊著請教會的長老替伊祈禱，奉主的名給伊抹油。 |
| 5:15 | 有信心的祈禱會救病人；主會互伊閣好起來，伊所犯的罪嘛會得著赦免。 |
| 5:16 | 所以，恁著互相認罪，相替祈禱，通互恁得著醫好。義人的祈禱有大功效。 |
| 5:17 | 以利亞及咱平平是人。伊迫切祈禱毋通落雨，果然有三年半久地上無落雨。 |
| 5:18 | 伊閣祈禱，天果然落大雨，土地就生產五穀。 |
| 5:19 | 我的兄弟姊妹，恁中間若有人偏離真理，有人閣給伊導倒轉來， |
| 5:20 | 恁著知，互失迷的倒轉來彼個人會救罪人的靈魂脫離死亡，互伊真多的罪得著遮蓋。 |