| 章節 | 現代台語漢字2021版經文 |
| 3:1 | 控制嘴舌 兄弟姊妹，恁中間毋通有真多人作教師。咱知，咱作教師的人會受較嚴格的審判。 |
| 3:2 | 因為咱大家攏常常犯真多錯誤；講話無錯誤的是完全的人，伊會曉控制家己。 |
| 3:3 | 咱用馬咬韁鬥佇馬的嘴裡，互𪜶馴服，通控制歸隻馬的行動。 |
| 3:4 | 閣看，船雖然赫大隻，互大風吹，拍，只有用一支細細的船舵給伊控制，駛船的人就會當照家己的意思駛。 |
| 3:5 | 親像按呢，嘴舌是細的器官，猶久會講大話。 閣想看咧，一點仔火星嘛會互歸個樹林攏燒去。 |
| 3:6 | 嘴舌是火。佇咱的肢體中，嘴舌是邪惡的世界，會污染咱歸身軀。此個火是對地獄點𤏸的，會互人歸個人生燒滅。 |
| 3:7 | 人會當制伏逐種野獸、飛鳥、蟲𧒴，及魚類；其實嘛已經給𪜶攏制伏啦。 |
| 3:8 | 毋拘，無人會當制伏嘴舌；嘴舌是無人控制會牢的邪惡，充滿致命的毒。 |
| 3:9 | 咱用嘴舌謳咾主咱的父，嘛用嘴舌咒詛照上帝家己的形像所造的人。 |
| 3:10 | 感謝及咒詛的話攏對仝一個嘴出。兄弟姊妹，按呢是無應該！ |
| 3:11 | 對仝一個泉源豈會淐出甜的及苦的水！ |
| 3:12 | 兄弟姊妹，無花果樹豈會生橄欖？葡萄樹豈會生無花果？鹹的水源嘛𣍐出甜的水！ |
| 3:13 | 對頂面來的智慧 恁中間什麼人有智慧，有見識？若有，著用謙卑及智慧，通過家己的好品行表現出來。 |
| 3:14 | 恁心內若有惡毒、怨妒，及自私，就毋通誇口，講白賊抵敵真理。 |
| 3:15 | 此款智慧毋是對天頂來的，是屬地上，屬血氣，屬魔鬼。 |
| 3:16 | 因為有怨妒及自私就有混亂及逐項歹行為。 |
| 3:17 | 對頂面來的智慧，頭一項是純潔，閣來是和平、溫和、有度量、充滿慈悲，閣𠢕結好果子，無偏私，無虛假。 |
| 3:18 | 公義是促進和平的人用和平撒的種籽所結的果子。 |