| 章節 | 現代台語漢字2021版經文 |
| 13:1 | 上帝所歡喜的服事 著繼續相親相疼。 |
| 13:2 | 著會記得好款待出外人。因為有人按呢做，無意中接待著天使。 |
| 13:3 | 著關懷受關監的人，親像及𪜶啲同受關；著關懷受虐待的人，親像恁本身啲受虐待。 |
| 13:4 | 婚姻人人著尊重；著保持純潔的夫妻關係，因為上帝會審判私通行淫的人。 |
| 13:5 | 毋通貪財，家己所有的著知足，因為上帝有講：「我𣍐離開你，嘛𣍐放拺你。」 |
| 13:6 | 所以咱會當好膽講：
主是我的幫贊，我𣍐驚惶， 人會當給我按怎？ |
| 13:7 | 著數念引導恁，傳上帝的信息互恁的人，注意看𪜶的生活及結局來學習𪜶的信。 |
| 13:8 | 耶穌基督昨日、今日，直到永遠攏𣍐改變。 |
| 13:9 | 恁毋通互逐款奇異的教義導迷路，因為心靈較好著靠上帝的恩典來堅固，毋是靠食物。靠遵守食物規例的人攏無得著利益。 |
| 13:10 | 咱有一個祭壇，頂面的祭物佇會幕內服事的人無權通食。 |
| 13:11 | 𪜶的大祭司帶牲生的血進入至聖所為著人民贖罪，牲生的身軀卻佇營外燒。 |
| 13:12 | 所以，為著欲用家己的血互人民得著潔淨，耶穌嘛佇營外犧牲來死。 |
| 13:13 | 按呢，咱著出去營外，去伊遐，及伊同受凌辱。 |
| 13:14 | 因為佇遮咱無永久的城；咱是啲尋彼個啲欲來的城。 |
| 13:15 | 所以，咱著通過耶穌繼續將稱讚的祭獻互上帝，這是宣認主的名的人的嘴唇所結的果子。 |
| 13:16 | 著會記得做好事，互相幫贊，因為這是上帝所歡喜的祭物。 |
| 13:17 | 著服從引導恁的人，聽趁𪜶的話，因為𪜶不時啲看顧恁的靈魂，通互𪜶對上帝交代清楚。恁著互𪜶歡喜工作，無吐氣；若無，對恁無利益。 |
| 13:18 | 著繼續為著阮祈禱；阮確信家己有清白的良心，意愛凡事照起工生活。 |
| 13:19 | 我懇求恁著特別為著我祈禱，求上帝互我通較緊去恁遐。 |
| 13:20 | 祝福及最後的請安 上帝已經互咱的主耶穌對死人中閣活。伊通過耶穌所流的血確立永遠的約，互耶穌成做羊群的大牧者。願此位賜平安的上帝互恁佇逐項好事完全來行伊的旨意，通過耶穌基督佇咱中間成就伊所歡喜的事！願榮光歸互上帝，直到永永遠遠。阿們！ |
| 13:21 | 併於上節 |
| 13:22 | 兄弟姊妹，我互恁的批無偌長，我勸恁耐心聽我勸勉的話。 |
| 13:23 | 我愛恁知，咱的兄弟提摩太已經出獄；伊若較早來，我會隨時及伊做夥去看恁。 |
| 13:24 | 請替我給恁所有的領導者及攏總的信徒請安。對意大利來的信徒嘛欲給恁請安。 |
| 13:25 | 願上帝的恩典及恁大家同在。阿們！ |