| 章節 | 現代台語漢字2021版經文 |
| 4:1 | 既然上帝互人進入安歇的應允猶留啲，咱著小心，才免恁中間有人想講𪜶得𣍐著此個應允。 |
| 4:2 | 福音平平有傳互𪜶，嘛有傳互咱；毋拘𪜶所聽見的信息對𪜶無利益，因為𪜶許個聽的人無用信心領受。 |
| 4:3 | 咱諸個信的人會當進入上帝所賜的安歇，照伊講的：
我佇受氣中立誓，講： 𪜶絕對𣍐當進入我所賜的安歇！ 其實上帝創造宇宙的時，伊的工作已經完成。 |
| 4:4 | 關係第七日，聖經一個所在有按呢講：「上帝佇第七日煞伊一切的工作來安歇。」 |
| 4:5 | 仝此個所在有閣講：「𪜶絕對𣍐當進入我所賜的安歇。」 |
| 4:6 | 既然代先聽著福音的人因為毋順趁𣍐當進入安歇，上帝就為著其他的人保留此個安歇。 |
| 4:7 | 真久以後，佇大闢的冊有記載，上帝設定一日叫做「今仔日」，親像頂面講的：
今仔日恁若聽上帝的聲， 毋通硬心。 |
| 4:8 | 約書亞若有互𪜶安歇，上帝就𣍐佇後來閣講起別個日。 |
| 4:9 | 按呢，上帝猶為著伊的子民保留一個安歇日的安歇。 |
| 4:10 | 因為進入上帝所賜安歇的人，親像上帝煞伊的工作，嘛煞𪜶一切的工作。 |
| 4:11 | 所以，咱著勞力進入此個安歇，才免有人親像許個毋順服的人跋倒失敗。 |
| 4:12 | 上帝的話是活的，是有功效的，比一切雙面利的劍較利，會當插入，甚至破開人的靈及魂，關節及骨髓，閣會當判斷人心內的慾望及意念。 |
| 4:13 | 所有被造物無一項會當對上帝隱密；一切攏完全暴露佇伊的目睭前。咱欠伊的賬攏著算清楚。 |
| 4:14 | 大祭司耶穌 既然咱有一位偉大的大祭司 — 上帝的子耶穌，伊已經上天到上帝的面前，咱著堅守所宣認的信仰。 |
| 4:15 | 咱此位大祭司毋是𣍐體貼咱的軟弱；伊佇逐方面攏親像咱有受試探，不過無犯罪。 |
| 4:16 | 所以，咱著好膽就近上帝恩典的寶座，通領受伊的憐憫及恩典，做咱需要的時的幫贊。 |