| 章節 | 現代台語漢字2021版經文 |
| 12:1 | 上帝呼召亞伯蘭 上主對亞伯蘭講：「你著離開本地、本族，恁老父的家，去我欲指示你的地。 |
| 12:2 | 我欲互你成做大國，欲賜福你，互你的名受敬重，你嘛欲互人得著福氣。
|
| 12:3 | 祝福你的，我欲賜福互𪜶；
咒詛你的，我欲咒詛伊； 地上萬族欲因為你得著福氣。」 |
| 12:4 | 亞伯蘭照上主的吩咐，就出去，羅得嘛及伊去。亞伯蘭離開哈蘭的時七十五歲。 |
| 12:5 | 亞伯蘭導伊的某莎萊及伊的侄仔羅得出發，閣帶𪜶佇哈蘭所積聚的財物、得著的僕人女婢，欲去迦南地。 𪜶來到迦南地， |
| 12:6 | 亞伯蘭繼續行，來到示劍的摩利橡樹遐；彼時迦南人住佇彼個地。 |
| 12:7 | 上主對亞伯蘭顯現，講：「我欲將此個地賞賜你的後代。」伊就佇遐為著對伊顯現的上主起一座祭壇。 |
| 12:8 | 伊閣對遐徙到伯特利東旁的山區，搭布棚，佇遐為著上主起一座壇，求叫上主的名；彼個所在西旁是伯特利，東旁是艾。 |
| 12:9 | 亞伯蘭漸漸徙去南旁的尼革夫。 |
| 12:10 | 亞伯蘭落去埃及 彼個地飢荒真嚴重。亞伯蘭落去埃及，寄居佇遐。 |
| 12:11 | 啲欲到埃及的時，亞伯蘭對伊的某莎萊講：「我知你是生做真媠的婦仁人； |
| 12:12 | 埃及人若看著你，會講：『此個是伊的某。』𪜶會給我刣死，互你活啲。 |
| 12:13 | 拜託你講你是我的小妹，互我通因為按呢平安無事，免互人刣死。」 |
| 12:14 | 亞伯蘭到埃及的時，埃及人看著彼個婦仁人有夠媠。 |
| 12:15 | 法老的人臣看著伊，就佇法老的面前謳咾伊的媠。彼個婦仁人就互人帶入去法老的王宮。 |
| 12:16 | 法老因為此個婦仁人好款待亞伯蘭；亞伯蘭就得著牛、羊、公的驢、母的驢、駱駝，以及僕人及女婢。 |
| 12:17 | 上主因為亞伯蘭的某莎萊的緣故，降大災禍佇法老及伊的全家。 |
| 12:18 | 法老就叫亞伯蘭來，講：「你哪對我做此款代誌？無給我講伊是你的某？ |
| 12:19 | 是按怎你講伊是你的小妹，煞害我給伊娶來做某？今你的某佇遮，導轉去。」 |
| 12:20 | 法老就命令部下送亞伯蘭、伊的某，及伊一切所有的離開。 |