| 章節 | 現代台語漢字2021版經文 |
| 4:1 | 佇上帝及啲欲審判所有活人及死人的基督耶穌面前，閣因為基督欲顯現來作王，我慎重吩咐你： |
| 4:2 | 著傳道理，無論時機適合無適合攏著堅持去傳；著用最大的耐心及教導來勸勉，督責，鼓勵。 |
| 4:3 | 因為時機啲欲到，彼時人聽𣍐落健全的教示，掩耳孔毋聽真理，反轉趁家己的私慾，耳孔癢，聘請一個閣一個教師來講合意聽、無影跡的傳說。 |
| 4:4 | 併於上節 |
| 4:5 | 總是你凡事著謹慎，忍受苦難，做傳道者的工作，盡你做上帝差用的本分。 |
| 4:6 | 今我犧牲家己獻互上帝的時到啦；此陣就是我離開世間的時。 |
| 4:7 | 美好的競賽我已經拼了；著走的路程我已經走完；著守的信仰我已經堅守。 |
| 4:8 | 義的花冠現在已經為我準備好勢，主 — 公義的審判者佇彼個日欲互我；毋若互我，嘛欲互攏總欣慕伊顯現的人。 |
| 4:9 | 私人的交代 著盡所會趕緊來我遮； |
| 4:10 | 因為底馬貪愛現世，已經離開我去帖撒羅尼迦；革勒士嘛已經去加拉太，提多去撻馬太。 |
| 4:11 | 只有路加及我做夥佇遮。你著導馬可做夥來，因為伊對我的侍奉真有幫贊。 |
| 4:12 | 我已經派推基古去以弗所。 |
| 4:13 | 我佇特羅亞留佇加布𪜶兜彼領外衫，你來的時著帶來，嘛著帶許個冊來，特別是許個羊皮的冊卷。 |
| 4:14 | 拍銅師傅亞歷山大給我害甲真慘；主會照伊的所做給伊報應。 |
| 4:15 | 你家己嘛著持防，因為伊極力反對咱所傳的信息。 |
| 4:16 | 我頭一遍申訴的時無人佇身邊幫贊我，逐個攏給我放拺。願此個罪無歸佇𪜶。 |
| 4:17 | 毋拘主有徛佇我身邊，互我有氣力通完整傳揚信息，互所有的外邦人攏聽見。最後我有對獅的嘴受救出。 |
| 4:18 | 主會救我脫離攏總的歹代，嘛會救我進入伊天裡的國度。願榮光歸伊，直到永永遠遠。阿們！ |
| 4:19 | 最後的請安 請給百基拉、亞居拉，及阿尼色弗全家請安。 |
| 4:20 | 以拉都繼續𫢶佇哥林多；特羅非摩破病，我給伊留佇米利都。 |
| 4:21 | 著盡所會佇冬天以前來。 友布羅、布田、利努、革老底亞，及眾兄弟姊妹攏欲給你請安。 |
| 4:22 | 願主及你的心靈同在！願上帝的恩典及恁同在！ |