| 章節 | 現代台語漢字2021版經文 |
| 2:1 | 基督的精兵 所以，我的子啊，你著靠基督耶穌的恩典堅強起來。 |
| 2:2 | 你佇真多見證人面前對我聽著諸個教示，著交託互許個忠實，嘛會堪得教示別人的人。 |
| 2:3 | 你著作基督耶穌的精兵及我做夥受苦。 |
| 2:4 | 服役的兵若欲互官長歡喜，就毋通互生活的代誌纏腳絆手。 |
| 2:5 | 運動員若無照規則比賽就𣍐當得著冠軍的花冠。 |
| 2:6 | 骨力種作的農夫當然先收成。 |
| 2:7 | 我所講的話你著好好仔想，因為主會互你了解逐項代誌。 |
| 2:8 | 著會記得耶穌基督，伊是大闢的後代，上帝互伊對死人中閣活；這是我所傳的福音。 |
| 2:9 | 我為著此個福音受苦，甚至親像犯人互人鍊啲；毋拘上帝的話無受捆縛。 |
| 2:10 | 所以，我為著上帝所揀選的人忍受一切，互𪜶嘛會得著基督耶穌的拯救及永遠的榮光。 |
| 2:11 | 此句話通相信：
咱若及伊同死， 嘛會及伊同活。 |
| 2:12 | 咱若吞忍，
嘛會及伊做夥掌權。 咱若毋認伊， 伊嘛會毋認咱。 |
| 2:13 | 咱若失信，
伊猶原信實， 因為伊𣍐當違背家己。 |
| 2:14 | 主所歡喜的工人 你著提醒大家，佇主的面前命令𪜶毋通為著言辭爭辯；按呢做無利益，會互聽的人受傷害。 |
| 2:15 | 著盡力做，通互上帝看做可取無見笑的工人，正確解說真理的道。 |
| 2:16 | 著閃避粗俗無路用的話，因為此款代誌會互人愈無敬虔， |
| 2:17 | 此款的話會親像毒瘡湠開。舒米乃及腓理徒嘛是此款人； |
| 2:18 | 𪜶已經離開真理，講閣活的事已經過去，致到一寡人的信仰完全倒壞。 |
| 2:19 | 上帝的地基堅固𣍐搖動，頂面有刻字講：「主識屬伊的人」，閣講：「求叫主的名的人攏著離開不義。」 |
| 2:20 | 佇大間厝內，毋若有金及銀，嘛有柴及瓷的器具；有的做幼的，有的做粗的路用。 |
| 2:21 | 人若潔淨家己，離開諸個粗俗的事，就會成做貴氣的器具，聖化互主人用，通準備好勢做逐項好事。 |
| 2:22 | 著閃避少年人的情慾；著及許個用清氣的心求叫主的人做夥追求公義、信仰、仁愛，及和平。 |
| 2:23 | 毋通有愚戇無知的辯論；你知諸個代誌會引起冤家。 |
| 2:24 | 主的僕人無應該冤家，著溫和對待眾人，𠢕教示，𠢕忍受， |
| 2:25 | 溫柔勸戒反對者，豈採上帝會互𪜶悔改，識真理。 |
| 2:26 | 按呢𪜶雖然已經互魔鬼掠去順趁伊的意思，嘛猶會醒悟來脫離伊的羅網。 |