| 章節 | 現代台語漢字2021版經文 |
| 1:1 | 我保羅、西拉，及提摩太寫批互帖撒羅尼迦屬咱的父上帝及主耶穌基督的教會。 |
| 1:2 | 願恁對咱的父上帝及主耶穌基督得著恩典及平安！ |
| 1:3 | 基督來臨的時的審判 兄弟姊妹，阮應該不時為著恁感謝上帝；按呢做是當然，因為恁的信心有大進步，恁眾人的相疼嘛一直啲加添。 |
| 1:4 | 所以阮佇上帝的眾教會中用恁做誇口，因為恁受一切的迫害及忍受患難的時猶保持堅忍及信心。 |
| 1:5 | 這證實上帝判定恁會堪得承受上帝國是公道，恁就是為著此個啲受苦。 |
| 1:6 | 既然上帝是公道，伊會用災難報應許個互恁抵著災難的人， |
| 1:7 | 嘛互恁諸個抵著災難的人，佇主耶穌及伊有大能力的天使佇火焰中對天顯現的時，通及阮平平得著安歇。彼時，伊會刑罰許個毋認上帝及毋順趁咱的主耶穌的福音的人。 |
| 1:8 | 併於上節 |
| 1:9 | 𪜶會受永遠毀滅的刑罰，離開主的面前，及伊榮光的氣力隔斷。 |
| 1:10 | 伊來臨的時會對伊的信徒得著榮光，閣對所有信伊的人得著尊崇。佇彼日恁嘛會佇𪜶中間，因為恁有信阮對恁所做的見證。 |
| 1:11 | 為著此個目的，阮不時啲為著恁祈禱，懇求咱的上帝互恁的生活會符合伊的呼召，嘛賜恁氣力來實現一切善良的心意及信心的作為， |
| 1:12 | 通互咱的主耶穌的名佇恁中間得著榮光，恁嘛對伊得著榮光；這攏是咱的上帝及主耶穌基督的恩典。 |