| 章節 | 現代台語漢字2021版經文 |
| 5:1 | 準備迎接主來臨 兄弟姊妹，關係此個代誌發生的時及期，無需要寫批給恁講， |
| 5:2 | 因為恁家己知主的日會親像賊仔暗時偷偷仔來。 |
| 5:3 | 人啲講「平安無事」的時，災難親像產婦催陣的痛疼忽然臨到𪜶，無法度通逃避。 |
| 5:4 | 毋拘，兄弟姊妹，恁毋是佇烏暗中，彼個日𣍐親像賊仔忽然來。 |
| 5:5 | 因為恁攏是光明的人，是日時的人；咱毋是屬暝時，毋是屬烏暗。 |
| 5:6 | 所以，咱毋通親像其他的人啲睏，著醒醒，著謹慎。 |
| 5:7 | 因為睏的人攏是暗時啲睏；酒醉的人是暗時啲醉。 |
| 5:8 | 既然咱是屬日時的人，著謹慎，用信心及疼心做護胸甲穿，用得救的向望做頭盔戴。 |
| 5:9 | 上帝無安排咱著受刑罰，是欲互咱通過主耶穌基督來得著救。 |
| 5:10 | 基督替咱死，是欲互咱無論是死抑是活，攏會當及伊做夥活。 |
| 5:11 | 所以，親像恁現在按呢，著繼續互相鼓勵，彼此造就。 |
| 5:12 | 最後的勸勉及請安 兄弟姊妹，請恁著敬重佇恁中間啲著磨，嘛是主揀選來指導及勸勉恁許個人。 |
| 5:13 | 閣著因為𪜶所做的工，用上大的敬意及疼心對待𪜶。恁家己著和睦相處。 |
| 5:14 | 兄弟姊妹，阮苦勸恁著警戒貧憚的人，勉勵無膽的人，幫贊軟弱的人；對眾人著寬容。 |
| 5:15 | 恁著謹慎，毋通用歹報歹，著不時為著彼此以及所有的人做好事。 |
| 5:16 | 著不時歡喜； |
| 5:17 | 著繼續祈禱； |
| 5:18 | 無論什麼境遇攏著感謝；因為這是上帝所意愛，愛恁諸個屬基督耶穌的人按呢做。 |
| 5:19 | 毋通拍化聖神的火； |
| 5:20 | 毋通藐視先知的話。 |
| 5:21 | 事事著察驗；好的著持守， |
| 5:22 | 一切的邪惡著棄拺。 |
| 5:23 | 願賜平安的上帝親身給恁完全聖化，互恁的靈、魂，及體佇咱的主耶穌基督來臨的時得著保全，無通嫌！ |
| 5:24 | 呼召恁的上帝是信實，伊一定會完成此個事。 |
| 5:25 | 兄弟姊妹，請為著阮祈禱。 |
| 5:26 | 著真誠給攏總的兄弟姊妹請安。 |
| 5:27 | 阮奉主的名吩咐恁著讀此張批互眾兄弟姊妹聽。 |
| 5:28 | 願咱的主耶穌基督的恩典及恁同在！ |