| 章節 | 現代台語漢字2021版經文 |
| 3:1 | 所以，阮等𣍐牢，決定干焦阮留佇雅典， |
| 3:2 | 就差阮的兄弟，嘛是為著上帝傳基督福音的同工提摩太，去恁遐，來鼓勵恁，堅固恁的信心， |
| 3:3 | 互恁中間無人因為所抵著的苦難致到動搖。恁家己知，咱抵著苦難是上帝的安排。 |
| 3:4 | 阮猶及恁做夥的時，有先給恁講起阮會受苦難，後來真正有發生，這是恁所知的。 |
| 3:5 | 因為按呢，我等𣍐牢才差提摩太去恁遐，愛知恁的信心按怎，才免恁受試探者迷惑，致到阮佇恁中間的勞苦落空。 |
| 3:6 | 現在提摩太已經對恁遐倒來，將關係恁的信心及疼心的好消息報阮知，閣給阮講恁時常啲數念阮，愛及阮見面，親像阮愛及恁見面。 |
| 3:7 | 因為按呢，兄弟姊妹，佇一切的患難及困苦中阮有對恁的信心得著安慰。 |
| 3:8 | 恁若對主有堅固的信心，阮才會當講現在有真正啲活。 |
| 3:9 | 阮佇上帝的面前因為恁來歡喜；對這一切的歡喜，阮著按怎感謝才有夠額？ |
| 3:10 | 阮暝日迫切祈求通見恁的面，來補足恁信心的需要。 |
| 3:11 | 願咱的天父上帝及咱的主耶穌給阮開路通去恁遐。 |
| 3:12 | 願主互恁相疼及疼眾人的心一直加添，親像阮對恁的疼有愈加添。 |
| 3:13 | 按呢，伊會互恁的心堅固，佇咱的主耶穌及伊的眾信徒來臨的時，佇咱的父上帝的面前聖潔、無通嫌。阿們！ |