| 章節 | 現代台語漢字2021版經文 |
| 2:1 | 保羅佇帖撒羅尼迦的工作 兄弟姊妹，恁家己知阮去恁遐訪問毋是無效果。 |
| 2:2 | 恁知阮去恁遐以前佇腓立比雖然受著迫害及侮辱，猶久有倚靠咱的上帝好膽面對真多阻礙，傳上帝的福音互恁。 |
| 2:3 | 阮的勸勉毋是出佇錯誤抑是無純正的動機，嘛毋是欲騙人。 |
| 2:4 | 既然上帝看阮會堪得，將福音交託阮，阮就照按呢講，毋是欲互人歡喜，是欲互監察阮內心的上帝歡喜。 |
| 2:5 | 恁知，阮毋曾對恁講扶挺的話，嘛毋曾有貪心的念頭，上帝會當給阮作證。 |
| 2:6 | 阮嘛毋曾對人，無論是恁抑是別人，求榮光。 |
| 2:7 | 雖然作基督的使徒，阮本來通要求恁尊重阮；毋拘阮佇恁中間的時溫柔對待恁，親像奶母啲育囝仔。 |
| 2:8 | 既然阮赫呢疼惜恁，毋若願意及恁分享上帝的福音，連阮家己的性命都甘願互恁，因為恁是阮所疼的。 |
| 2:9 | 兄弟姊妹，著會記得阮的辛苦及勞碌；阮傳上帝的福音互恁的時，為著無愛加添恁任何人的負擔，阮暝日啲做工。 |
| 2:10 | 恁及上帝會當給阮作證，對恁諸個信徒，阮的作人偌呢純潔、正直、無通嫌。 |
| 2:11 | 恁知阮對待恁逐個人，親像老父對待家己的兒女。 |
| 2:12 | 阮苦勸恁，鼓勵恁，勸勉恁，愛恁的言行舉止會當符合上帝的旨意；伊有召恁進入伊家己的國度及榮耀。 |
| 2:13 | 阮嘛為著此個緣故常常感謝上帝，因為恁對阮聽著上帝的話的時，無給伊看做是人的話，顛倒看做確確實實是上帝的話；此個話佇恁信徒中間啲運作。 |
| 2:14 | 兄弟姊妹，恁有抵著佇猶太地上帝的教會，就是屬基督耶穌的教會所抵著的代誌。恁受著家己同胞的迫害，抵親像𪜶有受著猶太人的迫害。 |
| 2:15 | 許個猶太人刣死主耶穌及眾先知，嘛迫害阮。𪜶互上帝無歡喜，嘛及眾人做對敵， |
| 2:16 | 甚至阻擋阮傳福音互外邦人，互𪜶通得著救。許個猶太人繼續犯罪，直到罪惡貫滿。最後上帝的受氣臨到𪜶身上。 |
| 2:17 | 保羅向望閣去訪問 兄弟姊妹，阮受迫暫時及恁分離，不過是身軀相離，心卻無離開。阮偌呢迫切愛閣看著恁的面。 |
| 2:18 | 阮真愛去恁遐。我保羅一遍閣一遍想欲去訪問恁，毋拘撒旦給阮阻擋。 |
| 2:19 | 咱的主耶穌來臨的時，阮的向望、歡喜，及上誇口的是什麼？豈毋是恁？ |
| 2:20 | 恁實在是阮的榮光及歡喜。 |