| 章節 | 現代台語漢字2021版經文 |
| 2:1 | 基督是咱的模樣 既然恁及基督結連有得著激勵；既然恁對伊的疼有得著安慰；既然恁及聖神有團契；既然恁有經驗上帝的慈悲憐憫； |
| 2:2 | 恁著有像款的心志、像款的疼心、和諧的感情、一致的想法，通互我充滿歡喜。 |
| 2:3 | 毋通自私自利，嘛毋通追求虛榮；反轉著有謙遜的心，看別人比家己較𠢕。 |
| 2:4 | 恁逐個人毋通只有顧家己的代誌，嘛著顧別人的代誌。 |
| 2:5 | 恁著有基督耶穌的心志：
|
| 2:6 | 伊原本有上帝的身份，
卻無濫用及上帝平等的地位。 |
| 2:7 | 伊反轉摒空家己，
取奴僕的身份， 出世及人仝款， 用人的形體出現。 |
| 2:8 | 伊自願謙卑，
順服到死， 甚至死佇十字架頂。 |
| 2:9 | 因為按呢，上帝提升伊到上高的地位，
賜伊超越萬名的名號。 |
| 2:10 | 按呢，為著敬重耶穌的名，
天頂、地上、地下， 一切的腳頭窩攏會跪拜， |
| 2:11 | 逐個嘴攏宣認：
「耶穌基督是主」， 來榮耀父上帝。 |
| 2:12 | 親像光照世間 所以，親愛的兄弟姊妹，我佇恁遐的時，恁攏有順趁我；現在我無佇恁遐，恁閣較著按呢。著繼續驚惶愕愕惙來完成恁的得救； |
| 2:13 | 因為上帝時常佇恁中間啲做工，互恁有意願閣會實踐伊的好旨意。 |
| 2:14 | 無論做什麼代誌，攏毋通埋怨抑是爭論， |
| 2:15 | 互恁通清白純潔，佇此個邪惡腐敗的世代作上帝無缺點的子兒。著佇𪜶中間發光，親像光啲照世間， |
| 2:16 | 來堅守賜活命的信息，互我佇基督的日通誇口講家己無空空奔波，無空空勞苦。 |
| 2:17 | 我若著用家己的血做奠酒祭淋佇恁的信心所獻的祭物，我嘛歡喜，嘛欲及恁做夥歡喜。 |
| 2:18 | 像款，恁嘛著歡喜，及我分享歡喜。 |
| 2:19 | 提摩太及以巴弗提 我向望主耶穌互我會當緊差提摩太去恁遐，互我通聽著恁的消息來得著激勵。 |
| 2:20 | 只有伊有及我同心真正啲關心恁的代誌。 |
| 2:21 | 眾人攏啲追求家己的事，毋是耶穌基督的事。 |
| 2:22 | 毋拘提摩太的作人恁攏知，伊及我親像父及子做夥為著傳福音啲服事。 |
| 2:23 | 按呢，我一下知我的代誌有什麼結局，向望會當隨時差伊去恁遐。 |
| 2:24 | 我確信主嘛會互我真緊去見恁。 |
| 2:25 | 不過，我想講著差以巴弗提去恁遐；伊是我的兄弟、同工，及戰友，佇我需要的時恁有派伊來服事我。 |
| 2:26 | 伊真數念恁大家，嘛因為知影恁有聽著伊破病的代誌，心真艱苦。 |
| 2:27 | 伊確實有破病，甚至險死去。毋拘上帝有憐憫伊，毋若伊若定，嘛有憐憫我，互我毋免閣加添憂傷。 |
| 2:28 | 因為按呢，我趕緊欲差伊轉去恁遐，互恁會當閣見著伊來歡喜，嘛通減少我的掛慮。 |
| 2:29 | 所以，恁著佇主的內面歡歡喜喜給伊接納。著尊重親像伊此款的人， |
| 2:30 | 因為伊為著基督的工作冒性命的危險險險仔死，欲補恁做無夠的，替恁來服事我。 |