| 章節 | 現代台語漢字2021版經文 |
| 6:1 | 父母及兒女的關係 作兒女的，著順服父母，這是信主的人應該有的本分。 |
| 6:2 | 「著孝敬父母」，這是頭一條附帶應允的誡命，「按呢做恁就會逐項好勢，佇此個地久長徛起。」 |
| 6:3 | 併於上節 |
| 6:4 | 作父母的，毋通激恁的兒女受氣，著照主的管教及教示給𪜶培養。 |
| 6:5 | 奴隸及主人的關係 作奴隸的，及順服基督仝款，著用敬畏及驚惶專心順服恁佇世上的主人。 |
| 6:6 | 毋通佇人的面前故意做互人看，互人歡喜；著作基督的奴隸，對心內遵趁上帝的旨意， |
| 6:7 | 甘心樂意盡奴隸的本分，親像啲服事主，毋是啲服事人。 |
| 6:8 | 著知，無論是奴隸抑是自由的，主攏會照逐個人的好行為給𪜶報答。 |
| 6:9 | 作主人的，嘛著用仝款的態度對待恁的奴隸；毋通給𪜶威脅。著知，恁及恁的奴隸攏屬仝一位天頂的主人；伊用仝款的標準對待逐個人。 |
| 6:10 | 及邪惡交戰 最後，我勸恁著及主結連，靠伊的大能力做堅強的人。 |
| 6:11 | 著穿上帝所賜全套的武裝，互恁徛在，通抵抗魔鬼的詭計。 |
| 6:12 | 因為咱毋是及有血有肉的人啲交戰，是及天界的邪靈，就是此個烏暗世代的宇宙統領者、權力者、掌權者啲交戰。 |
| 6:13 | 所以，著用上帝所賜全套的武裝裝備家己，通佇邪惡的日子會當抵抗對敵的攻擊，堅持到底持守陣地。 |
| 6:14 | 所以，著徛在，用真理做帶縖，用正義做護胸甲穿， |
| 6:15 | 用準備好勢的和平的福音做鞋穿。 |
| 6:16 | 著不時用信心做盾牌，通拍化邪惡者射來火的箭。 |
| 6:17 | 著用拯救做頭盔，用聖神做劍，就是上帝的話。 |
| 6:18 | 著靠聖神全心祈禱，常常祈求。著不時警醒，時常為著所有的信徒祈禱； |
| 6:19 | 嘛為著我祈禱，求上帝賜我信息，通好膽開嘴宣揚福音的奧祕。 |
| 6:20 | 為著此個福音，我現在做一個掛鐵鍊的大使。著為著我祈禱，互我通好膽宣揚應該講的。 |
| 6:21 | 最後的請安 咱親愛的兄弟，嘛是主忠實的差用推基古，會報恁知我的代誌及近況。 |
| 6:22 | 我差伊去恁遐，目的是欲報恁知阮遮的情形，互恁的心得著鼓勵。 |
| 6:23 | 願父上帝及主耶穌基督賜平安、仁愛，及信心互眾兄弟姊妹！ |
| 6:24 | 願上帝的恩典及所有用不變的疼來疼咱的主耶穌基督的人同在！ |