| 章節 | 現代台語漢字2021版經文 |
| 3:1 | 保羅對外邦人傳福音 因為按呢，我保羅，為著恁外邦人作基督耶穌的囚犯，替恁對上帝祈求。 |
| 3:2 | 恁一定有聽著，為著恁，上帝對伊的恩典有委託我此個職務。 |
| 3:3 | 上帝有將伊的奧祕啟示互我知。我已經有簡略寫此個代誌， |
| 3:4 | 恁讀了就會明白我對基督奧祕的了解； |
| 3:5 | 此個奧祕，佇過去的世代無互人知，現在上帝通過聖神已經有對伊的聖使徒及先知啟示。 |
| 3:6 | 此個奧祕是按呢：外邦人通過福音通及猶太人平平作繼承人，平平屬一個身體，及基督耶穌結連平平承受上帝的應允。 |
| 3:7 | 對上帝特別的恩賜，通過伊大能力的運行，我成做福音的差用。 |
| 3:8 | 我佇上帝所有的子民中是第一微細的，伊竟然賜我恩典通將基督算𣍐了豐富的福音傳互外邦人， |
| 3:9 | 通互所有的人明白上帝按怎實現伊的奧祕。創造萬有的上帝佇過去的世代有將此個奧祕隱密起來， |
| 3:10 | 是欲佇現今的世代，通過教會，互天界的統領者、權力者，攏通認識上帝逐款的智慧。 |
| 3:11 | 上帝按呢做是根據伊永遠的旨意；此個旨意已經通過咱的主基督耶穌實現啦。 |
| 3:12 | 及基督結連，通過對伊的信，咱通充滿信心好膽就近上帝。 |
| 3:13 | 所以，請恁毋免因為我為著恁受苦來心艱苦；其實這是恁的光榮。 |
| 3:14 | 基督的疼 因為按呢，我跪落，向賜名號互天頂地上所有宗族的天父 |
| 3:15 | 併於上節 |
| 3:16 | 祈求，照伊豐富的榮耀，通過伊的聖神所賜的氣力，互恁內在的人勇壯起來。 |
| 3:17 | 我嘛祈求基督會因為恁的信來𫢶佇恁心內，互恁釘根下地基佇疼， |
| 3:18 | 會當及上帝所有的子民明白基督的疼是偌仔呢長、闊、高、深，閣經驗彼個超過人的智識所會當了解的疼，互上帝的完善給恁完全充滿。 |
| 3:19 | 併於上節 |
| 3:20 | 上帝會當用伊佇咱中間啲運行的大能力，大大超過咱所求所想的，來成就一切。 |
| 3:21 | 願榮耀佇教會中，通過基督耶穌歸互上帝，到世世代代，無窮無盡。阿們！ |