| 章節 | 現代台語漢字2021版經文 |
| 2:1 | 出死入活 以前因為恁犯罪背逆上帝，靈性已經死。 |
| 2:2 | 彼時，恁趁世間的潮流，順服空中的掌權者，就是現在啲管轄背逆上帝的人彼個邪神。 |
| 2:3 | 其實，阮以前嘛攏及諸個人仝款趁本性的慾望生活，照家己肉體的私慾及意念啲行動。阮及其他的人仝款，註定受上帝刑罰。 |
| 2:4 | 毋拘上帝有豐盛的憐憫，用極大的慈愛疼咱， |
| 2:5 | 佇咱猶啲背逆，靈性已經死的時，伊互咱及基督做夥閣活；恁是對上帝的恩典得著救的。 |
| 2:6 | 通過咱及基督耶穌結合，上帝互咱及伊做夥閣活，佇天頂做夥掌權。 |
| 2:7 | 伊按呢做是欲通過基督耶穌對咱顯示慈愛，通對後世代表明伊無限豐富的恩典。 |
| 2:8 | 因為恁是靠上帝的恩典對信得著救；毋是靠恁家己，是靠上帝的恩賜。 |
| 2:9 | 既然毋是靠行為，什麼人都𣍐當誇口。 |
| 2:10 | 因為咱是上帝創造的；伊通過基督耶穌創造咱，互咱通做伊早就準備愛咱做的好事。 |
| 2:11 | 佇基督成做一體 所以，恁諸個出世做外邦人的，著會記得恁過去有互自稱受割禮的，就是用手佇身軀行割禮的猶太人，叫做無受割禮的人。 |
| 2:12 | 恁彼時及基督無關係，無屬上帝的選民，無份佇上帝應允的盟約，佇此世間無向望，無上帝。 |
| 2:13 | 毋拘恁諸個以前離開上帝遠遠的外邦人，現在靠基督耶穌，通過伊的死，已經及上帝親近。 |
| 2:14 | 基督促進咱的和平；伊有互猶太人及外邦人成做一個。伊用家己的身軀拆毀給𪜶隔開的牆，消除𪜶中間的敵對。 |
| 2:15 | 伊廢除猶太律法的誡命及規例，互兩旁通過伊通創造一個新的人來促進和平。 |
| 2:16 | 基督通過十字架消滅彼此的敵對，互兩旁成做一體，通及上帝和好。 |
| 2:17 | 按呢，基督來是欲傳和平的福音互所有的人，包括恁諸個以前離開上帝遠遠的外邦人及親近上帝的猶太人。 |
| 2:18 | 通過基督，咱兩旁的人攏會當對仝一位聖神來親近父。 |
| 2:19 | 所以，恁外邦人已經毋是出外人，毋是僑民，是及上帝的子民平平作國民，作上帝家內的人， |
| 2:20 | 建立佇先知及使徒所下的地基頂，用基督耶穌本身做上重要的基石， |
| 2:21 | 歸個建築物靠伊來連接結合，漸漸擴大成做聖的殿歸屬主。 |
| 2:22 | 恁及伊結連，靠聖神的幫贊，嘛做夥受起造做上帝徛起的所在。 |