| 章節 | 現代台語漢字2021版經文 |
| 6:1 | 分擔重擔 兄弟姊妹，若有人陷落過失，恁諸個屬靈的人著用溫和的心給伊糾正。恁家己嘛著小心，才免受引誘。 |
| 6:2 | 著分擔重擔，按呢做才是啲實現基督的律法。 |
| 6:3 | 家己無𠢕想講真𠢕，是啲欺騙家己。 |
| 6:4 | 逐個人著省察家己的行為；若有好行為，伊干焦通對家己誇口，毋免及別人比較。 |
| 6:5 | 因為逐個人著擔家己的擔。 |
| 6:6 | 學習道理的人著及教導伊的人分享逐項好物。 |
| 6:7 | 毋通騙家己，上帝是𣍐用得侮慢的。人種什麼就收什麼。 |
| 6:8 | 人所撒的若是為著滿足家己的慾望，就會收成滅亡；人所撒的若是為著欲互聖神歡喜，就會對聖神收永遠的活命。 |
| 6:9 | 做好事毋通想倦；若無灰心，時到就通收成。 |
| 6:10 | 所以，無論什麼時陣，著把握機會對眾人做好事，特別是對信仰成做一家的人。 |
| 6:11 | 最後的警告及祝福 恁看，我親筆用即呢大的字寫互恁！ |
| 6:12 | 許個注重外表體面的人，想欲強迫恁接受割禮。𪜶按呢做干焦是無愛為著基督的十字架受迫害。 |
| 6:13 | 其實，連許個受割禮的人本身嘛無遵守律法。𪜶迫恁受割禮，才會當誇口講恁有遵守外表的禮儀。 |
| 6:14 | 我咧，我只有欲誇口咱的主耶穌基督的十字架，通過此個十字架，對我來講，世界已經釘死佇十字架；對世界來講，我嘛已經釘死。 |
| 6:15 | 有受割禮無受割禮攏無重要；重要的是咱著成做新創造的人。 |
| 6:16 | 照此個準則生活的人就是上帝的以色列子民。願平安及憐憫及𪜶同在！ |
| 6:17 | 對今以後，無論什麼人都攏毋通給我攪擾；因為耶穌有佇我的身軀蓋印做記號，證明我屬伊。 |
| 6:18 | 兄弟姊妹，願咱的主耶穌基督的恩典及恁同在。阿們！ |