| 章節 | 現代台語漢字2021版經文 |
| 3:1 | 律法抑是信 恁諸個戇加拉太人啊，啥人給恁迷惑？耶穌基督釘十字架的事，豈毋是真清楚顯示佇恁目睭前？ |
| 3:2 | 有一項代誌，我給恁請教：恁領受聖神是對守律法抑是對信所聽著的福音？ |
| 3:3 | 恁哪赫呢戇？恁既然對靠聖神開始，現在欲靠家己的氣力來完成是無？ |
| 3:4 | 恁有赫多受苦的經驗豈攏無路用？一定有才著。 |
| 3:5 | 上帝賜恁聖神，閣佇恁中間行神跡，是因為恁守律法，抑是因為恁信所聽著的福音？ |
| 3:6 | 聖經按呢講：「亞伯拉罕信上帝，上帝就給伊算做義。」 |
| 3:7 | 所以，恁著知，信的人才是亞伯拉罕真正的子孫。 |
| 3:8 | 聖經事先就知，上帝會互外邦人對信及伊有合宜的關係，所以有將此個好消息先傳互亞伯拉罕，講：「地上萬民會因為你得著祝福！」 |
| 3:9 | 按呢一切信的人嘛會及有信的亞伯拉罕做夥受祝福！ |
| 3:10 | 許個靠守律法的人攏活佇咒詛的下面，因為聖經講：「無遵守記載佇律法的冊裡所有規定的人攏著受上帝咒詛。」 |
| 3:11 | 按呢，無人會當靠守律法及上帝有合宜的關係，因為聖經有講：「義的人會對信來活。」 |
| 3:12 | 毋拘，律法毋是用信做根據。聖經講：「守律法的人靠律法來活。」 |
| 3:13 | 基督已經為著咱受咒詛，來救贖咱脫離律法的咒詛，因為聖經記載講：「所有吊佇柴頂的人攏著受咒詛。」 |
| 3:14 | 基督按呢做是欲將上帝互亞伯拉罕的祝福通過基督耶穌賜互外邦人，嘛欲互咱對信來領受上帝所應允的聖神。 |
| 3:15 | 律法及應允 兄弟姊妹，我用一個日常生活的代誌做例來說明。人所立的契約一旦成立，就𣍐用得加添抑是廢除。 |
| 3:16 | 上帝有對亞伯拉罕及伊的子孫應允。聖經並毋是講「子子孫孫」，指真多人，是講「你的子孫」，指一個，就是基督。 |
| 3:17 | 我的意思是按呢：上帝有及亞伯拉罕立約，閣答應欲守約。四百三十年後才出現的律法，𣍐當廢除此個約互上帝的應允失效。 |
| 3:18 | 因為，承接上帝賜的產業若是根據律法，就無閣靠應允。毋拘上帝是照伊的應允施恩互亞伯拉罕。 |
| 3:19 | 按呢，律法有啥路用？律法是為著欲互人知什麼是罪過，通過天使對一個中間人來制定的，功效到所應允彼位「子孫」來臨的時就結束。 |
| 3:20 | 毋拘單方一旁做的代誌就無需要中間人，上帝是單方一個做此項代誌。 |
| 3:21 | 律法的目的 按呢，律法及上帝的應允有相牴觸無？絕對無！因為律法頒布的目的若是欲互人得著活命，人就會當靠律法及上帝有合宜的關係。 |
| 3:22 | 毋拘聖經斷定全世界攏佇罪惡管轄的下面，通互上帝將應允通過信耶穌基督賜互信的人。 |
| 3:23 | 毋拘「信」的時代來臨以前，咱互律法關啲，受監視直到啲欲來「信」的時代顯現的時。 |
| 3:24 | 按呢，佇基督來臨以前，律法做咱的監護人，通互咱對「信」及上帝有合宜的關係。 |
| 3:25 | 現在「信」的時代已經來臨，律法就無閣做咱的監護人。 |
| 3:26 | 恁大家對信及基督耶穌結連成做上帝的子兒。 |
| 3:27 | 恁所有領受洗禮及基督結連的人已經穿基督，有伊的活命。 |
| 3:28 | 按呢，無分猶太人抑是外邦人，奴隸抑是自由的，查甫人抑是查某人，佇基督耶穌的內面攏成做一體。 |
| 3:29 | 恁既然屬基督，就是亞伯拉罕的子孫，是上帝應允的繼承人。 |