| 章節 | 現代台語漢字2021版經文 |
| 9:1 | 關係賑濟信徒的事 關係賑濟猶太信徒的事，我毋免閣寫批互恁。 |
| 9:2 | 我知恁甘心幫贊，我曾為著此項代誌對馬其頓人誇口講：「亞該亞的信徒佇舊年就準備好勢。」恁的熱心有感動𪜶大部分的人。 |
| 9:3 | 我有差幾若個兄弟去恁遐，向望恁照我所講的準備好勢，才免我佇此項代誌為著恁對人的誇口落空。 |
| 9:4 | 若無，馬其頓人若及我去，看著恁無準備好勢，阮會因為過頭相信恁煞真漏氣，恁豈𣍐閣較漏氣！ |
| 9:5 | 所以，我想應該鼓勵許個兄弟先去恁遐，叫恁前答應欲捐獻的錢先準備好勢。按呢我到位的時恁攏準備好啦，表示恁的捐獻毋是勉強，是甘心樂意。 |
| 9:6 | 著知：撒少收少，撒多收多。 |
| 9:7 | 所以逐個人著照家己所決定的來獻，毋通毋甘，嘛毋通勉強；因為上帝疼歡喜奉獻的人。 |
| 9:8 | 上帝會將逐項恩典豐豐富富賜福互恁，毋若家己逐項夠額，閣會當做逐項好事。 |
| 9:9 | 照聖經所記載：
伊慷慨賑濟散赤人； 伊的好行為續到永遠。 |
| 9:10 | 供給種籽互撒種的，閣賞賜食物互人食彼位上帝，會將恁所需要的種籽供給恁，閣互種籽愈多，嘛互恁仁義的果子豐收。 |
| 9:11 | 伊會互恁事事富足，通隨時慷慨施捨，互真多人通過阮接著恁的禮物來感謝上帝。 |
| 9:12 | 因為恁所做此個侍奉的工作毋若解決信徒的需要，嘛互𪜶對上帝的感謝加添到滿出來。 |
| 9:13 | 通過恁所做此個侍奉證實恁有順趁所宣認基督的福音，以及恁對𪜶及其他所有的人慷慨的捐獻，通歸榮光互上帝。 |
| 9:14 | 上帝賜恁無限的恩典，互𪜶會閣較敬愛恁，閣為著恁祈禱。 |
| 9:15 | 感謝上帝，伊有互咱𣍐當形容的恩賜！ |