| 章節 | 現代台語漢字2021版經文 |
| 7:1 | 親愛的朋友，既然咱得著諸個應允，咱著潔淨家己，除去一切互身軀及心靈拍垃墋的事，敬畏上帝互生活完全聖化。 |
| 7:2 | 保羅的歡喜 恁著用寬大的心對待阮。阮毋曾剋虧人，毋曾害人墮落，毋曾偏人。 |
| 7:3 | 我按呢講，毋是欲給恁譴責。我以前曾講，阮真疼恁，願意及恁同死同活。 |
| 7:4 | 我真信任恁，用恁做誇口。我充滿安慰；佇阮一切的患難中，我有滿滿的歡喜。 |
| 7:5 | 阮到馬其頓以後，身軀無通歇睏，反轉逐項代誌攏抵著困難，外面有紛爭，內面有驚惶。 |
| 7:6 | 毋拘，安慰失志的人的上帝有差提多來，互阮得著安慰； |
| 7:7 | 毋若因為伊有來，閣因為伊有講起恁按怎給伊鼓勵的代誌。伊有給阮講起恁愛見我，恁的心艱苦，及恁對我的熱情，互我閣較歡喜。 |
| 7:8 | 我前彼張批互恁心艱苦，我無後悔。雖然知影彼張批有互恁一時心艱苦，我曾後悔， |
| 7:9 | 總是現在我真歡喜，毋是因為恁心艱苦，是因為恁的艱苦心有致到恁悔改。上帝有善用恁的艱苦心，所以阮所做的對恁無傷害。 |
| 7:10 | 因為上帝善用恁的艱苦心來互恁悔改通得著救，阮就無什麼通後悔；毋拘屬世的艱苦心會互人致到死。 |
| 7:11 | 恁看，上帝赫呢𠢕善用恁的艱苦心，才互恁赫呢迫切辯明家己的清白，赫呢憤慨，赫呢有警戒心，赫呢有期待，赫呢熱情，赫呢劇烈譴責不法；佇逐項代誌，恁已經有證明家己的清白。 |
| 7:12 | 所以，雖然我有寫彼張批，毋拘毋是為著彼個給人剋虧，抑是彼個受人剋虧的人，是欲對恁表明恁佇上帝的面前對阮的熱情有偌深。 |
| 7:13 | 因為按呢，阮有得著安慰。 阮毋若得著安慰，嘛因為看著提多的歡喜閣較歡喜，因為伊的心有對恁大家得著激勵。 |
| 7:14 | 我曾對伊褒獎恁，恁無互我漏氣。我逐項代誌攏對恁講實在話，我對提多褒獎恁的話嘛是實在。 |
| 7:15 | 所以，伊想起恁大家按怎順服伊，恭恭敬敬給伊接待，伊對恁的疼心就愈深。 |
| 7:16 | 我非常歡喜，因為我會當完全信任恁。 |