| 章節 | 現代台語漢字2021版經文 |
| 5:1 | 因為阮知，咱佇地上啲住此個布棚的厝若拆起來，上帝會互咱天頂的厝，毋是人的手起的，是永遠的厝。 |
| 5:2 | 咱現在佇此個布棚啲吐氣，熱切向望通去𫢶天頂的厝，親像衫疊落去， |
| 5:3 | 若疊落去就𣍐赤身露體。 |
| 5:4 | 咱猶𫢶佇此個布棚背重擔啲吐氣；咱毋是愛褪去地上的體，是欲疊屬天的體，通互活命給會死的吞落去。 |
| 5:5 | 互咱有此個改變的是上帝，伊賜聖神互咱，給咱保證。 |
| 5:6 | 所以，阮不時有勇氣。阮知，咱猶住佇此個身軀啲活的時，是及主相離。 |
| 5:7 | 因為咱啲活，毋是靠目睭看，是靠信心。 |
| 5:8 | 阮有勇氣，較愛離開此個身軀去及主住。 |
| 5:9 | 所以，無論佇此個身軀抑是離開此個身軀，阮的目的是愛互主歡喜。 |
| 5:10 | 因為咱攏一定著徛佇基督的面前受伊審判。逐個人攏著照家己佇地上的身軀所做的，無論是好抑是歹，接受報應。 |
| 5:11 | 通過基督及上帝和好 既然阮知影著敬畏主，阮就苦勸人。對上帝來看，阮是什麼款人真清楚；我向望對恁的良心來看嘛真清楚。 |
| 5:12 | 阮毋是欲閣對恁推薦家己，是互恁有機會用阮做誇口，互恁通回應許個注重外表無注重內心的人。 |
| 5:13 | 阮若熱狂，是為著上帝；阮若清醒，是為著恁。 |
| 5:14 | 因為基督的疼催迫阮做此個結論：一人為著眾人死，眾人就攏死。 |
| 5:15 | 伊為著眾人死，是欲互許個活啲的人無閣為著家己活，是為著彼位替𪜶死閣活的基督來活。 |
| 5:16 | 所以，對今以後阮無閣根據人的標準識人。雖然阮曾用人的標準識基督，毋拘現在無閣按呢識伊。 |
| 5:17 | 按呢，無論什麼人，若及基督結連就是新創造的人；舊的已經過去，今攏變做新的。 |
| 5:18 | 諸個一切攏是上帝的作為；伊通過基督互咱及伊閣和好，閣將互人及伊和好的職務交代阮。 |
| 5:19 | 阮所傳的信息是按呢：上帝通過基督互世間人及伊和好，無閣追究𪜶的罪過，閣將此個和好的信息交託阮。 |
| 5:20 | 所以，阮作基督的大使，上帝通過阮給恁苦勸。阮替基督給恁求，著及上帝和好。 |
| 5:21 | 上帝互無罪的基督為著咱的緣故成做有罪，互咱通靠基督及上帝建立合宜的關係。 |