| 章節 | 現代台語漢字2021版經文 |
| 3:1 | 新的約的差用 阮豈閣啲推薦家己？阮豈著親像一寡人寫推薦書互恁，抑是需要恁的推薦書？ |
| 3:2 | 恁本身就是阮的推薦書，寫佇阮的心內，欲互眾人知，眾人讀。 |
| 3:3 | 真明顯，恁是基督所寫通過阮來送的批。此張批毋是用墨水寫佇石版，是用永活上帝的神寫佇人的心版。 |
| 3:4 | 阮通過基督對上帝有此款的確信才按呢講。 |
| 3:5 | 這毋是講阮家己有才調通做此個代誌，阮的才調是對上帝來的。 |
| 3:6 | 伊賜阮有才調通做新的約的差用；毋是用文字寫的，是聖神的約。文字互人死，毋拘聖神互人活。 |
| 3:7 | 用文字刻佇石版的律法頒布的時，上帝的榮光有顯現。對摩西的面反照出來的光雖然漸漸啲消失，毋拘彼個光猶真強，致到以色列子孫𣍐當目睭金金給伊看。互人致到死的事工都有此款的榮光， |
| 3:8 | 按呢聖神的事工所發出的榮光豈𣍐閣較大？ |
| 3:9 | 彼個給人定罪的事工若會發出此款的榮光，此個給人宣布無罪的事工所顯出的榮光豈𣍐閣較大！ |
| 3:10 | 按呢，因為現在的榮光比以前的閣較大，以前的榮光煞無去。 |
| 3:11 | 彼個會消失的若會發出榮光，此個永存的一定會顯出閣較大的榮光。 |
| 3:12 | 因為阮有此款的向望才即呢勇敢。 |
| 3:13 | 阮無親像摩西著用帕罩家己的面。摩西按呢做，才免互以色列子孫看著伊面的榮光漸漸消失，到尾攏無去。 |
| 3:14 | 毋拘𪜶的心鈍，一直到今仔日𪜶讀舊的約的時，𪜶的心猶互彼塊帕罩啲。因為只有及基督結連，彼塊帕才提起來。 |
| 3:15 | 甚至到今仔日，𪜶逐擺讀摩西的律法，彼塊帕猶罩佇𪜶的心。 |
| 3:16 | 毋拘，當𪜶歸向主的時，帕就提起來。 |
| 3:17 | 此位主就是聖神；有主的神的所在就有自由。 |
| 3:18 | 咱大家攏用無罩帕的面啲反照主的榮光；此個榮光是對主，就是對聖神發出來的榮光，啲給咱改造成做伊的形像，互咱有閣較大的榮光。 |