| 章節 | 現代台語漢字2021版經文 |
| 15:1 | 基督的閣活 兄弟姊妹，我欲給恁提醒：我傳互恁的福音恁有接受，嘛用這做信仰的基礎。 |
| 15:2 | 恁若有堅守我所傳的信息，毋是空空信，就會靠此個福音得著救。 |
| 15:3 | 我已經有將我本身所領受彼個上重要的信息傳互恁，就是照聖經所記載，基督為著咱的罪死， |
| 15:4 | 埋葬；閣照聖經所記載，伊第三日閣活； |
| 15:5 | 伊有對彼得顯現，閣對十二使徒顯現。 |
| 15:6 | 後來伊有一擺對五百外個兄弟顯現；許個人有的已經死，毋拘大部分的人猶活啲。 |
| 15:7 | 後來伊有對雅各顯現，閣對所有的使徒顯現。 |
| 15:8 | 最後，伊嘛對我此個若準無夠月就出世的人顯現。 |
| 15:9 | 我是使徒中上微細的，𣍐堪得稱做使徒，因為我曾迫害上帝的教會。 |
| 15:10 | 毋拘有上帝的恩典才有今仔日的我，伊賜互我的恩典無落空。我顛倒比其他的使徒閣較拍拼工作，其實毋是我家己，是上帝的恩典及我同在。 |
| 15:11 | 所以，無論是我抑是𪜶，這是阮所啲傳，恁已經有啲信的。 |
| 15:12 | 信徒的閣活 既然阮所宣揚的是基督已經有對死人中閣活，恁中間哪有人講無死人閣活此款代誌？ |
| 15:13 | 若無死人閣活，按呢基督就無閣活。 |
| 15:14 | 若基督無閣活，按呢阮所宣揚的是空空，恁的信嘛是空空。 |
| 15:15 | 按呢阮就是啲為上帝做假見證，因為阮見證上帝已經互基督閣活；死人若無閣活，上帝就無互基督閣活。 |
| 15:16 | 若死人無閣活，基督就無閣活。 |
| 15:17 | 基督若無閣活，恁的信就無路用，恁就猶佇罪惡中。 |
| 15:18 | 按呢，許個信基督了後死去的人嘛攏滅亡啦。 |
| 15:19 | 咱信基督的人若干焦佇現世有向望，咱是所有的人的中間上通可憐的。 |
| 15:20 | 毋拘，現在上帝已經有互基督對死人中閣活，通做已經死去的人閣活的保證。 |
| 15:21 | 因為死通過一個人來，死人的閣活嘛是通過一個人來。 |
| 15:22 | 對亞當眾人攏著死，按呢，對基督眾人嘛攏會閣活。 |
| 15:23 | 不過逐個人攏著照家己的順序閣活：頭一個是基督，續落去是基督來臨的時屬伊的人， |
| 15:24 | 閣來才是末期；彼時伊會消滅一切的統領者、掌權者，及權力者，然後將統治權交互父上帝。 |
| 15:25 | 因為基督一定著統治，直到上帝互一切的對敵攏屈服佇伊的腳下。 |
| 15:26 | 最後受毀滅的對敵是死。 |
| 15:27 | 因為聖經記載講：「上帝互萬有攏屈服佇伊的腳下。」真明顯，遮所講的「萬有」並無包含互萬有屈服佇基督腳下的上帝。 |
| 15:28 | 到萬有攏屈服基督的時，子本身嘛會屈服佇互萬有攏屈服的上帝，通互上帝完全統轄一切。 |
| 15:29 | 若毋是按呢，人替死人受洗有什麼意思？若無死人閣活的事，是按怎欲替死人受洗？ |
| 15:30 | 阮是按怎著時時刻刻冒險？ |
| 15:31 | 兄弟姊妹，我奉咱的主基督耶穌對恁諸個我所誇口的人好膽講：我逐日面對死。 |
| 15:32 | 我佇以弗所及「野獸」鬥爭，若純粹是出佇人的動機，對我有什麼利益？死人若無閣活，會親像人啲講：「咱來食，來飲，明仔載都欲死啦！」 |
| 15:33 | 毋通互人騙去。「交著歹朋友會破壞品德！」 |
| 15:34 | 著覺醒，想互清楚，毋通閣犯罪，因為有一寡人猶毋識上帝，我講諸個是欲互恁知通見笑。 |
| 15:35 | 閣活的體 豈採有人欲問：「死人按怎閣活？𪜶會用什麼款的體來？」 |
| 15:36 | 戇人！恁撒落地的種籽若無死去，豈會活起來？ |
| 15:37 | 恁所撒的，無論是麥仔抑是別款五穀，不過是種籽，毋是後來大欉的形體。 |
| 15:38 | 上帝照伊的旨意互種籽有形體；逐款種籽有家己的形體。 |
| 15:39 | 逐款動物的肉體嘛攏無仝款：人的肉體一款，獸類一款，鳥類一款，魚類閣一款。 |
| 15:40 | 有天頂的體，有地上的體；天體的光及地上的體的光無仝款。 |
| 15:41 | 日頭有日頭的光，月有月的光，星有星的光；甚至逐粒星的光都攏無仝款。 |
| 15:42 | 死人的閣活嘛是按呢。埋落去的會朽爛，閣活的𣍐朽爛； |
| 15:43 | 埋落去的是卑賤的，閣活的是榮耀的；埋落去的是軟弱的，閣活的是勇壯的； |
| 15:44 | 埋落去的是血肉的體，閣活的是屬靈的體。既然有血肉的體，就有屬靈的體。 |
| 15:45 | 所以聖經有記載：「頭一個人亞當受造做有活命的人」，毋拘路尾的亞當是賜活命的神。 |
| 15:46 | 代先有的毋是屬靈的，是血肉的，後來才有屬靈的。 |
| 15:47 | 頭一個人是對地出，是土造的；第二個人是對天來的。 |
| 15:48 | 所有用土造的人攏及彼個頭一個用土造的人仝款；所有屬天的人嘛及彼個路尾來屬天的人仝款。 |
| 15:49 | 抵親像咱有彼個頭一個用土造的人的形像，嘛會有彼個路尾來屬天的人的形像。 |
| 15:50 | 兄弟姊妹，我給恁講：血肉的體𣍐當承受上帝國；會朽爛的嘛𣍐當承受𣍐朽爛的。 |
| 15:51 | 我欲給恁講一項奧祕：咱𣍐攏死，不過佇一瞬間，一目𥍉久，最後的喇叭一下彈，咱攏會改變；喇叭彈，死人會閣活，變做𣍐朽爛的，咱嘛攏會改變。 |
| 15:52 | 併於上節 |
| 15:53 | 因為此個會朽爛的一定著變做𣍐朽爛的，會死的變做𣍐死的。 |
| 15:54 | 當會朽爛的變做𣍐朽爛的，會死的變做𣍐死的彼時，聖經所記載的話就會應驗：
死互勝利吞落去啦！ |
| 15:55 | 死啊，你的勝利佇叨位？
死啊，你的毒刺佇叨位？ |
| 15:56 | 死的毒刺是罪，罪的威力是對律法來的。 |
| 15:57 | 感謝上帝，伊通過咱的主耶穌基督互咱得著勝利。 |
| 15:58 | 所以，親愛的兄弟姊妹，著徛在，毋通動搖。著常常盡力為主做工，因為恁知為主著磨做工一定𣍐落空。 |