| 章節 | 現代台語漢字2021版經文 |
| 8:1 | 祭偶像的物 關係祭偶像的物，咱知「咱攏有智識」。其實智識會互人驕傲；毋拘疼心會造就人。 |
| 8:2 | 家己想講有智識的，實際上應該知的，伊猶毋知。 |
| 8:3 | 人若疼上帝，伊是上帝所識的人。 |
| 8:4 | 所以，關係食祭偶像的物，咱知，世間的偶像攏毋是真的，咱嘛知只有一位上帝，以外無別個。 |
| 8:5 | 雖然佇天頂抑是地上有所謂的神明，閣雖然有真多「神」抑是「主」， |
| 8:6 | 毋拘
咱只有一位上帝，就是天父； 萬有對伊來創造，咱為著伊來活。 咱只有一位主，就是耶穌基督； 萬有通過伊創造，咱嘛通過伊來存在。 |
| 8:7 | 毋拘，毋是逐個人攏有此款智識。有人拜偶像慣勢，到今仔日食物的時猶想講是啲食祭偶像的物；𪜶的良心軟弱，想講會互彼款食物沐垃墋。 |
| 8:8 | 其實食物𣍐互咱較接近上帝；無食無損失，食嘛無較有利益。 |
| 8:9 | 毋拘著細膩，毋通因為恁自由的行為成做軟弱的人信仰的阻礙。 |
| 8:10 | 若有人良心軟弱，看著恁所謂「有智識」的人佇偶像的廟內飲食，按呢恁豈毋是啲鼓勵𪜶食祭偶像的物？ |
| 8:11 | 按呢，此個軟弱的信徒嘛是基督為著伊死的人，會因為恁的「智識」來滅亡。 |
| 8:12 | 恁按呢做是得罪恁的兄弟抑是姊妹，傷害著𪜶的良心就是得罪基督。 |
| 8:13 | 所以，若食物會互兄弟抑是姊妹的信仰受阻礙，我絕對毋食祭偶像的肉，才免互我的兄弟抑是姊妹的信仰受阻礙。 |