章節 | 現代台語漢字2021版經文 |
2:1 | 基督十字架的信息 兄弟姊妹,我以前去恁遐的時無用媠的言辭抑是智慧宣講上帝的奧祕。 |
2:2 | 因為我決定,佇恁中間什麼都毋講,只有欲講耶穌基督以及伊受釘死佇十字架的事。 |
2:3 | 我佇恁遐的時,軟弱閣驚甲皮皮惙。 |
2:4 | 我所講的話,所宣講的信息,攏無用巧妙智慧的言辭,是靠上帝的神的大能力來證實, |
2:5 | 是欲互恁的信仰毋是靠人的智慧,是靠上帝的大能力。 |
2:6 | 上帝的智慧 雖然是按呢,對許個靈性成熟的人我嘛有講智慧,不過毋是此世間的智慧,嘛毋是此世間註定會失勢的統治者的智慧。 |
2:7 | 我所講的是上帝奧祕的智慧,是對人隱密的,是上帝為著欲互咱得著榮光,佇創世以前就先決定的。 |
2:8 | 此世間的統治者無一個認識此個智慧,𪜶若識就𣍐將榮耀的主釘死佇十字架。 |
2:9 | 照聖經所記載:
上帝為著疼伊的人準備的, 是目睭毋曾看著, 耳孔毋曾聽著, 嘛毋曾有人想著的。 |
2:10 | 毋拘上帝已經有通過聖神將諸個事對咱啟示。聖神徹底知萬事,連上帝深沉的旨意嘛知。 |
2:11 | 只有人家己內面的神才知家己的事;親像按呢,只有上帝的神才知上帝的事。 |
2:12 | 咱領受的毋是世間的神,是對上帝來的神,欲互咱知上帝賜互咱的恩賜。 |
2:13 | 所以,阮對屬靈的人解說屬聖神的事,毋是用人所教的智慧,是用聖神所教的話。 |
2:14 | 屬血氣的人𣍐當領受對上帝的神來的恩賜,諸個恩賜對伊來講是愚戇的,無法度了解,因為只有屬靈的人才會當領悟。 |
2:15 | 屬聖神的人會曉判斷萬事,不過伊本身的事無人會當給伊判斷。 |
2:16 | 聖經有記載:
什麼人知主的心意? 什麼人會當替伊出主意? 毋拘咱有基督的心意。 |