| 章節 | 現代台語漢字2021版經文 |
| 3:1 | 平安祭 若有人欲獻牛做平安祭，著對牛群的中間取一隻無瑕疵的牛抑是牛母，給伊牽來上主的面前。 |
| 3:2 | 彼個人著按手佇彼隻牛的頭殼頂，佇會幕的門口給刣。亞倫的後代做祭司的，著將血灑佇祭壇的四周圍。 |
| 3:3 | 奉獻的人著對平安祭的祭物，將腹內及伊頂面的油、兩粒腰子及𪜶邊仔的油，以及肝及伊的網紗攏提起來，用火燒獻互上主。 |
| 3:4 | 併於上節 |
| 3:5 | 亞倫的子孫就給諸個下佇壇裡啲𤏸的柴頂面，及燒化祭做夥燒做芳芳的祭物，獻互上主。 |
| 3:6 | 若有人欲獻羊做平安祭互上主，著對羊群的中間取一隻無瑕疵的羊抑是羊母，給伊牽來。 |
| 3:7 | 彼個人若欲獻綿羊仔，著牽來上主的面前， |
| 3:8 | 按手佇彼隻羊仔的頭殼頂，佇會幕的門口給刣。亞倫的子孫著將血灑佇祭壇的四周圍。 |
| 3:9 | 奉獻的人著對平安祭的祭物取油，就是將尾胴骨以下歸支肥的尾、腹內及伊頂面的油、兩粒腰子及𪜶邊仔的油，以及肝及伊的網紗攏提起來，通做用火燒獻互上主的祭物。 |
| 3:10 | 併於上節 |
| 3:11 | 祭司著將諸個下佇祭壇頂，用火燒做食物獻互上主。 |
| 3:12 | 若有人欲獻山羊做祭物，著牽來上主的面前， |
| 3:13 | 按手佇彼隻山羊的頭殼頂，佇會幕的門口給刣。亞倫的子孫著將血灑佇祭壇的四周圍。 |
| 3:14 | 奉獻的人著將腹內及伊頂面的油、兩粒腰子及𪜶邊仔的油，以及肝及伊的網紗攏提起來，通做用火燒獻互上主的祭物。 |
| 3:15 | 併於上節 |
| 3:16 | 祭司著將諸個下佇祭壇頂，用火燒做芳芳的食物。所有的油攏著歸上主。 |
| 3:17 | 恁無論住佇什麼所在，油及血攏毋通食；這欲做恁世世代代永遠的規例。 |