| 章節 | 現代台語漢字2021版經文 |
| 2:1 | 素祭 若有人欲獻素祭互上主，著用幼麵粉做祭物；著斟油佇麵粉頂面，閣下乳香。 |
| 2:2 | 伊著將諸個帶去亞倫的後代做祭司的遐；祭司著搣一大把幼麵粉，提一寡油及所有的乳香，下佇祭壇頂，代表所獻的素祭，用火燒做芳芳的祭物獻互上主。 |
| 2:3 | 素祭所賰的著歸互亞倫及伊的子孫；這是至聖的，因為是對用火燒獻互上主的祭物留落來的。 |
| 2:4 | 你若欲獻火爐烘過的祭物做素祭，著用抄油的幼麵粉做的無酵餅，抑是抹油的無酵薄餅。 |
| 2:5 | 若欲獻煎盤煎過的祭物做素祭，著用抄油的幼麵粉煎的無酵餅。 |
| 2:6 | 著給伊擘做細塊細塊，斟油佇頂面；這是素祭。 |
| 2:7 | 若欲獻鼎仔煎的祭物做素祭，著用抄油的幼麵粉做。 |
| 2:8 | 著將諸個素祭帶去上主的面前，交代祭司，互伊帶到祭壇。 |
| 2:9 | 祭司著對素祭的中間提一部份下佇祭壇頂，代表所獻的素祭，用火燒做芳芳的祭物獻互上主。 |
| 2:10 | 素祭所賰的著歸互亞倫及伊的子孫；這是至聖的，因為是對用火燒獻互上主的祭物留落來的。 |
| 2:11 | 恁欲獻互上主的素祭毋通摻酵；因為酵及蜜攏𣍐用得用火燒做祭物獻互上主。 |
| 2:12 | 諸個物恁通獻互上主做起頭熟的祭物，毋拘毋通佇祭壇頂給伊燒做芳芳的祭物獻互上主。 |
| 2:13 | 素祭著用鹽調和；所有的素祭攏著濫鹽，因為鹽是上帝及恁立約的記號。所有的祭物攏著有鹽。 |
| 2:14 | 恁若用起頭熟的五穀做素祭獻互上主，著用烘過新的麥穗，抑是碖過新的五穀。 |
| 2:15 | 著斟油佇彼頂面，閣下乳香；這是素祭。 |
| 2:16 | 祭司就對彼中間提一部份碖過新的五穀，及油，以及所有的乳香，代表所獻的素祭，用火燒做祭物獻互上主。 |