| 章節 | 現代台語漢字2021版經文 |
| 1:1 | 燒化祭 上主對會幕叫摩西，命令伊 |
| 1:2 | 對以色列人頒布下面的條例： 恁若有人欲獻牲生做禮物互上主，著對牛群羊群的中間取來獻。 |
| 1:3 | 伊若欲獻牛做燒化祭，著牽一隻無瑕疵的牛來，佇會幕的門口獻，就會得著上主接納。 |
| 1:4 | 伊著按手佇燒化祭的牲生的頭殼頂，按呢燒化祭就受接納，替伊贖罪。 |
| 1:5 | 伊著佇上主的面前刣彼隻牛仔；亞倫的後代做祭司的著獻許個血，將血灑佇會幕門口祭壇的四周圍。 |
| 1:6 | 彼個人著將燒化祭的牲生的皮剝起來，給肉切做一塊一塊。 |
| 1:7 | 亞倫的後代做祭司的著佇祭壇頂起火，給柴排佇火的頂面， |
| 1:8 | 閣將肉、頭、油排佇壇頂啲𤏸的柴頂面。 |
| 1:9 | 奉獻的人著將祭物的腹內及腿用水洗清氣，祭司就將歸個祭物攏下佇壇頂做燒化祭，用火燒做芳芳的祭物獻互上主。 |
| 1:10 | 人若欲獻綿羊抑是山羊做燒化祭，著獻一隻無瑕疵的羊。 |
| 1:11 | 伊著佇上主的面前，佇祭壇的北旁刣彼隻羊；亞倫的後代做祭司的著將羊的血灑佇壇的四周圍。 |
| 1:12 | 彼個人著給彼隻羊切做一塊一塊。後來，祭司將許個肉連頭及油，排佇祭壇啲𤏸的柴頂面。 |
| 1:13 | 奉獻的人著將祭物的腹內及腿用水洗清氣，祭司就將歸個祭物攏下佇祭壇頂，用火燒做芳芳的燒化祭獻互上主。 |
| 1:14 | 人若欲獻鳥仔做燒化祭互上主，著獻斑鴿抑是粉鳥仔子。 |
| 1:15 | 祭司著帶鳥仔來祭壇前，捘斷伊的頭，給頭燒佇壇頂；互鳥仔的血滴佇壇邊。 |
| 1:16 | 閣著將鳥仔的胿及內面的物件，㧒佇壇邊的東旁摒火灰的所在。 |
| 1:17 | 著給鳥仔兩支翼提啲，將鳥仔拆開，毋拘毋通拆斷；祭司著將鳥仔排佇祭壇啲𤏸的柴頂面，用火燒做芳芳的燒化祭獻互上主。 |