| 章節 | 現代台語漢字2021版經文 |
| 38:1 | 造祭壇 ( 出 27:1-8 ) 比撒列用金合歡木做燒化祭的祭壇；長及闊攏兩公尺二十公分，是四方的；高一公尺三十公分。 |
| 38:2 | 佇壇的四角頭做四支翹起來的角，及壇連做夥；歸座祭壇用銅包啲。 |
| 38:3 | 伊閣用銅做壇所有的器具，就是桶仔、托仔、碗、肉叉，及火鼎。 |
| 38:4 | 伊為祭壇做一個銅的網，安佇祭壇四面圍腰板的下半旁，互網對壇的半腰伸到下底。 |
| 38:5 | 伊佇銅的網的四角頭鑄四個銅環，做穿槓的路用。 |
| 38:6 | 伊用金合歡木做槓，用銅包啲， |
| 38:7 | 將槓穿佇祭壇雙旁的環內面，通扛祭壇；用枋做祭壇，中央是空的。 |
| 38:8 | ( 出 30:18 ) 伊用銅做洗盪的盆及盆座；是用佇會幕門口服事的婦仁人的銅鏡做的。 |
| 38:9 | 造會幕的埕 ( 出 27:9-19 ) 伊用挲過的幼麻給會幕圍一個埕；南旁的帷長四十四公尺。 |
| 38:10 | 帷有二十支柱，二十個有榫孔的銅座；柱的鉤仔及橫杆攏用銀做。 |
| 38:11 | 北旁的帷長四十四公尺，柱二十支，銅座二十個；柱的鉤仔及橫杆攏用銀做。 |
| 38:12 | 埕西旁的帷二十二公尺，柱十支，銅座十個；柱的鉤仔及橫杆攏用銀做。 |
| 38:13 | 埕東旁的帷闊二十二公尺。 |
| 38:14 | 入口的雙旁，帷的長攏六公尺六十公分，吊帷的柱各三支，有榫孔的銅座各三個。 |
| 38:15 | 併於上節 |
| 38:16 | 埕四面的帷攏是用挲過的幼麻做的。 |
| 38:17 | 柱的座是銅的，柱的鉤仔及橫杆是銀的；柱斗是用銀包的；埕所有的柱攏用銀的橫杆連接啲。 |
| 38:18 | 埕入口的門簾是用刺繡的手路，用藍色、紫色、朱紅色的紗，及挲過的幼麻繡的；闊九公尺，高度及埕的帷仝款兩公尺。 |
| 38:19 | 吊門簾的柱有四支，有榫孔的銅座有四個；柱的鉤仔是銀的，柱斗及橫杆用銀包啲。 |
| 38:20 | 會幕及埕周圍的杙仔攏是銅的。 |
| 38:21 | 造會幕使用的金屬 下面諸個是利未人照摩西的命令，經過祭司亞倫的子以他瑪的指導，清點囥約櫃的會幕內面器具的記錄。 |
| 38:22 | 猶大支族，戶珥的孫，烏利的子比撒列，有完成上主命令摩西所著做的。 |
| 38:23 | 伊的同工但支族，亞希撒抹的子亞何利亞伯是雕刻師，嘛是設計師，真𠢕用藍色、紫色、朱紅色的紗，及幼麻刺繡。 |
| 38:24 | 為著聖所所有的工程奉獻的金仔，照聖所的公秤，攏總有一千公斤。 |
| 38:25 | 會眾中間點算過的人所獻的銀，照聖所的公秤，有三千四百三十公斤。 |
| 38:26 | 二十歲以上有登記的，總共六十萬三千五百五十人；照聖所的公秤，逐個人奉獻六公克的銀。 |
| 38:27 | 𪜶用三千四百公斤的銀，鑄聖所及帳簾有榫孔的座，總共一百個；逐個座三十四公斤。 |
| 38:28 | 許個賰落來的三十公斤的銀，比撒列用來做柱的鉤仔，包頂面的柱斗，做橫杆。 |
| 38:29 | 會眾奉獻的銅有兩千四百二十五公斤。 |
| 38:30 | 𪜶用諸個銅做會幕門口有榫孔的座、祭壇、祭壇的銅網，及祭壇所有的器具， |
| 38:31 | 以及埕四圍的座及埕的門的座、會幕及埕四圍攏總的杙仔。 |