| 章節 | 現代台語漢字2021版經文 |
| 23:1 | 譴責經學教師及法利賽派的人 ( 可 12:38-40 路 11:43, 46 20:45-47 ) 後來，耶穌對群眾及伊的門徒講： |
| 23:2 | 「經學教師及法利賽派的人坐摩西的位解說律法。 |
| 23:3 | 所以，𪜶所給恁講的，恁攏著做，著遵守；不過毋通學𪜶的行為，因為𪜶會講𣍐做。 |
| 23:4 | 𪜶將人擔無法的重擔捆互人擔，家己連一支指頭仔都毋肯振動。 |
| 23:5 | 𪜶所有的行為攏是欲做互人看，因為𪜶將家己的經文袋做較闊，衫仔裾的鬚做較長。 |
| 23:6 | 𪜶愛佇宴會坐大位，佇會堂坐高位， |
| 23:7 | 佇市場口互人請安，互人稱呼『拉比』。 |
| 23:8 | 毋拘恁毋通互人稱做『拉比』，因為恁只有一位『老師』，恁攏是兄弟姊妹。 |
| 23:9 | 佇地上，恁毋通稱呼人做『老父』，因為恁只有一位『老父』，就是佇天頂彼位。 |
| 23:10 | 恁嘛毋通互人稱做『教師』，因為恁只有一位『教師』，就是基督。 |
| 23:11 | 恁中間上大的著做恁的差用。 |
| 23:12 | 提高家己的，會受降低；屈低家己的，會受高升。」 |
| 23:13 | 責備假好的人 ( 路 11:39-42, 44, 52 20:47 ) 「假好的經學教師及法利賽人，恁慘啊！恁將天國的門關起來，毋互人入去；恁家己毋入去，連欲入去的人嘛毋互𪜶入去。 |
| 23:15 | 「假好的經學教師及法利賽人，恁慘啊！恁為著欲互一個人改宗入教，天邊海角行透透。彼個人入教了後，恁煞互伊變做地獄的子，比恁重倍歹。 |
| 23:16 | 「睛瞑做導路的，恁慘啊！恁講：『人指聖殿咒誓無准算，毋拘若指殿內的金器咒誓就著守。』 |
| 23:17 | 恁諸個倲戇閣睛瞑的人啊，叨一項較重要？是金器抑是互金器成做神聖的聖殿？ |
| 23:18 | 恁閣講：『人指祭壇咒誓無准算，若指祭壇頂的祭物咒誓就著守。』 |
| 23:19 | 恁諸個睛瞑的人啊，是祭物抑是互祭物成做神聖的祭壇，叨一項較重要？ |
| 23:20 | 所以，人指祭壇咒誓，就是指祭壇及彼頂面所有的祭物咒誓。 |
| 23:21 | 人指聖殿咒誓，就是指聖殿及𫢶佇彼內面的上帝咒誓。 |
| 23:22 | 人指天咒誓，就是指上帝的寶座及坐佇彼頂面的上帝咒誓。 |
| 23:23 | 「假好的經學教師及法利賽人，恁慘啊！因為恁連芳料、薄荷、八角、小茴香都獻十分一互上帝，律法所重視的正義、仁慈，及信實，恁顛倒忽略。諸個才是恁應該實行的；頂面許個嘛毋通忽略。 |
| 23:24 | 恁諸個睛瞑做導路的，一隻細隻蠓蟲恁都給濾出來，駱駝顛倒歸隻給吞落去。 |
| 23:25 | 「假好的經學教師及法利賽人，恁慘啊！因為恁將杯及盤的外面洗清氣，內面卻貯滿貪慾及放縱。 |
| 23:26 | 恁諸個睛瞑的法利賽人啊，著先給杯的內面洗清氣，外面自然就清氣。 |
| 23:27 | 「假好的經學教師及法利賽人，恁慘啊！因為恁親像漆白白的墓，外面好看，內面卻貯滿死人的骨頭及逐項的污穢。 |
| 23:28 | 恁嘛親像按呢，外面互人看做義人，內面卻充滿假好及不法。 |
| 23:29 | 「假好的經學教師及法利賽人，恁慘啊！因為恁造先知的墓，整修義人的紀念碑， |
| 23:30 | 閣講『阮若活佇阮祖先的時代，一定𣍐及𪜶做夥殺害先知』。 |
| 23:31 | 按呢，恁是啲證實恁家己是殺害先知的人的子孫。 |
| 23:32 | 恁祖先做的歹代，做恁去完成好啦！ |
| 23:33 | 恁諸個毒蛇的子孫，奸鬼的人啊，恁豈會當逃閃地獄的刑罰？ |
| 23:34 | 所以，我欲差先知、智慧的人，及經學教師去恁遐；𪜶有的會互恁殺害抑是釘十字架，有的會互恁佇恁的會堂鞭拍，互恁對此個城趕到彼個城。 |
| 23:35 | 按呢，恁佇地上刣死義人的血債攏歸佇恁身上；就是對義人亞伯流的血到比利加的子撒迦利亞佇聖所及祭壇的中間流的血，攏歸佇恁身上。 |
| 23:36 | 我實在給恁講，諸個債攏會歸佇此世代的人。」 |
| 23:37 | 為耶路撒冷哀哭 ( 路 13:34-35 ) 「耶路撒冷啊，耶路撒冷啊，你刣死先知，閣用石頭抌死上帝差來你遮的使者。我偌多遍愛欲聚集你的子兒，親像雞母聚集雞仔子給𪜶攔佇翼股下，恁攏無愛！ |
| 23:38 | 恁看，恁的厝會荒廢，無人住。 |
| 23:39 | 我給恁講，對今以後恁絕對看𣍐著我，直到恁講：『奉主的名來彼位應該受稱讚！』」 |